یانا زاخۆ: ئه‌وا هاتیه روودان دێ پێرابوون بۆ هه‌بیت
ئه‌ڤرۆ،
د داخویانیه‌كێ دا سه‌رۆكێ یانا زاخۆ بلند شه‌فیق دیاركر ئه‌و روودانا ل شه‌ڤا ئه‌ینیا بوری ل یاریگه‌ها یانا وان دا ژلایێ چه‌ند ژ جه‌ماوه‌ره‌كێ ب ناڤێ یانێ په‌یدابوویی جهێ مخابنێ یه و دڤێت سنۆره‌ك بۆ هه‌بیت، د ده‌مێ یاریا تیما وان یا ته‌پا پێی ل گه‌ل یانا سیناعه ژ چارچووڤێ هه‌ڤڕكیێن گه‌ڕا دویێ یا خولا پلا نایابا ئیراقێ ئه‌وا ب سه‌ركه‌فتنا تیما وان ب دو گۆلا به‌رامبه‌ری گۆله‌كێ ب دووماهی هاتی.
ناڤهاتی بۆ ده‌زگه‌هێن راگه‌هاندنێ گۆت: ب مخابنی ڤه دڤیابا ئه‌ڤ دیمه‌ن و دیاردا كرێت مه جاره‌كا دی نه دیتبا ڤه ل ناڤ یاریگه‌ها خوه دا سه‌رباری ئه‌و زه‌حمه‌تا مه بری كو ژ نه‌چاری مه لایێن یاریگه‌هێ په‌رژانكر بوون ژی ژبۆ راوه‌ستاندنا ئه‌ڤان دیاردا لێ مخابن چه‌ند كه‌س بێ رێزی ل یانێ و جه‌ماوه‌رێ یانێ كرن كو ئه‌و كارێن دوور ژ ره‌وشتێ جه‌ماوه‌رێ یانێ ب هاڤێتنا به‌رمایكا و تۆندۆتیژی كرن، له‌وما ئه‌م به‌رهه‌ڤین بۆ هه‌ر پێنگاڤه‌كا هه‌بیت ژبۆ راوه‌ستاندنا ئه‌ڤان كارن و ئه‌وا هاتیه روودان دڤێت سنۆره‌ك بۆ هه‌بیت و نه‌هێلین ئه‌ڤ دیارده دۆباره بیت، ژبه‌ركو ئه‌ڤچه‌نده بوویه جهێ شه‌رمزاری بۆ مه و جهێ قه‌بوولكرنێ نینه ئه‌وا چه‌نده‌كێن كێم بوون ئه‌ڤ كاره كرین.
هه‌روه‌سان ناڤهاتی گۆت: بۆ ڕێگریێ ل ئه‌ڤان كارێن نه شرین وه‌كو كارگێریا یانێ یا دشیان دابیت دێ كار بو كه‌ین چو ل گه‌ل جهێن په‌یوه‌ندیدار و پۆلیس و جهێن ئه‌مینی پێخه‌مه‌ت ئارامیا ڤێ یاریێ و بلند راكرنا ناڤێ زاخۆ .
ل دووڤ ژێده‌رێن نێزیك ژ لژنا دووڤچوونێ ورێكخستنێ ل ئێكه‌تیا ته‌پا پێی یا ئیراقێ كو لسه‌ر ئه‌وان روودانا دبیت جه‌ماوه‌رێ تیما یانا زاخۆ بۆ سێ یاریان ژ یاریگه‌ها خوه بهێنه دوورخستن.
