د دو رۆژان دا دهۆك و زاخۆ پێنچ سه‌ركه‌فتن تۆماركرن
ئه‌ڤرۆ،
هه‌ردو یانێن باژێرێ به‌هدینان تیما یانا دهۆك و یانا زاخۆ شیان د ماوێ دو رۆژان دا پێنچ سه‌ركه‌فتنان ل دووڤ ئێك د خولێن ئیراقێ و كوردستانێ بۆ هه‌ردو یاریێن ته‌پا پێی و باسكێت بۆلێ بینن كو دهێته هژمارتن سه‌ركه‌فتنێن كێم وێنه ب ڤی شێوه‌یی بهێنه تۆماركرن.
ل پێنچ شه‌مبیا بوری تیما یانا دهۆك كاروانێ خوه یێ وه‌رزێ نوو بۆ خولا پلا نایابا كوردستانێ ب سه‌ركه‌فتیانه ده‌ستپێبكه‌ت پشتی ل یاریگه‌ها خوه سه‌ركه‌فتین ل سه‌ر یانا شێروانه بینت ب گۆله‌كێ ئه‌وا ژلایێ یاریزانێ وێ ئه‌حمه‌د كه‌ریم ب لێدانا په‌نه‌لتیێ كری، هه‌روه‌سان ل ئه‌ینیا بوری تیما دهۆكێ یا پشكدار د خولا پلا نایابا ئیراقێ دا شیا سه‌ركه‌فتنه‌كا گرنگ ل سه‌ر خودانێن ئه‌ردی یانا دیوانیه بینت ب گۆله‌كێ بێ به‌رامبه‌ر ئه‌وا ژلایێ هێرشبه‌رێ وێ پیشه‌كار برێنس ئۆبۆكۆ ڤه هاتبوو تۆماركرن.
ژلایێ خوه‌ڤه تیمێن یانا زاخۆ سێ سه‌ركه‌فتن د رۆژا ئه‌ینیا بوری دا ئینابوون ئه‌و ژی، ل باژێرێ سلێمانیێ تیما ته‌پا پێی یا یانا زاخۆ ئه‌وا پشكدار د خولا پلا نایابا كوردستانێ دا شیا د ڤه‌كرنا خولێ دا سه‌ركه‌فتنه‌كا گرنگ ژ ده‌رڤه‌یی یاریگه‌ها خوه ل سه‌ر یانا سه‌ید سادق بینیت ب گۆله‌كێ بێ به‌رامبه‌ر ئه‌وا ژلایێ یاریزان سه‌بری شڤان هاته تۆماركرن، د یاریه‌كا دی دا تیما باسكێت بۆلێ ئه‌وا پشكدار د خولا پلا نایابا كوردستانێ شیان سه‌ركه‌فتنێ ل سه‌ر خودانێن ئه‌ردی یانا ئاسۆ بینن ب91 خالان به‌رامبه‌ر 51 خالان، د هه‌ڤڕكیێن واندا ئه‌وا ژ گه‌ڕا ئێكێ یا خولێ ل هه‌ولێرا پایته‌خت هاتیه كرن، د یاریا سێیێ یا كورێن خابۆری و كه‌لها سۆر ب ئاماده‌بوونا جه‌ماوه‌ره‌كێ ئێكجار زوور ل شه‌ڤا ئه‌ینیا بوری تیما یانا زاخۆ شیا سه‌ركه‌فتنێ ل سه‌ر مێڤانا خوه یانا سیناعه یا به‌غدایی بینت ب دو گۆلان به‌رامبه‌ر گۆله‌كێ، هه‌ردو گۆلێن زاخۆ ژلایێ یاریزانان پیشه‌كار جۆتێنر هایده‌ر و مه‌نار ته‌ها په‌نه‌لتیێ تۆماركرن.
