ب 408 ملیۆن دیناران پێنچ یاریزانێن دهۆكێ سكالا تۆماركرینه
ئه‌ڤرۆ،
د داخویانیه‌كا تایبه‌ت دا یاریزانێ به‌رێ یێ تیما باسكێت بۆلا یانا دهۆك بۆ رۆژناما ئه‌ڤرۆ دیاركر ب فه‌رمی ل گه‌ل چار یاریزانان بڕێیا ئێكه‌تیێن نێڤده‌وله‌تی و ئاسیا داخوازا شایسته‌یێ خوه یێ مایی ژ گرێبه‌ستا ئیمزاكری ل گه‌ل یانا دهۆك كرینه ب هیڤییا وێ یه‌كێ كارگێریا نوكه ئاریشا وان چاره‌بكه‌ت.
زێده‌تر قوته‌یبه عه‌بدوللا گۆت: ب كۆژمێ 408 ملیۆن و 500 هزار دیناران یانا دهۆك قه‌ردارێ مه پێنچ یاریزانێن تیما باسكێت بۆلێ نه كو د وه‌رزێن دناڤبه‌را 2012-2013 ژ سه‌رجه‌مێ گرێبه‌ستێن ل ده‌ڤ مه پاراستی ب ئیمزا و مۆركرینه، وه‌كو مافه‌ك مه داخواز ژ كارگێریا به‌ری ڤان ژی كربوو لێ ئه‌وان دیاركر كاودانێن وان د باشن نینن له‌وما نوكه ژی ئه‌م نه‌چاربووینه مه سكالا خوه گه‌هاندیه ئێكه‌تیێن باسكێت بۆلا نێڤده‌وله‌تی FIBA و یا ئاسیایی و بابه‌ت گه‌هشتیه قۆناغێن دووماهیێ لێ هیڤییا مه ئه‌وه ژ كارگێریا نوكه چاره‌كێ بینن ژبه‌ركو مافێ مه‌یه و مه داخوازا كری و هیڤییا مه ئه‌وه نه گه‌هیته دادگه‌هان ژی.
هه‌روه‌سان ناڤهاتی گۆت: قه‌رێن من یێن مایی ل سه‌ر یانا دهۆك 170 ملیۆن دیناران و یێن هه‌ر ئێك ژ عه‌لی حاتم 161 ملیۆن، محه‌مه‌د زییا نێزیكی 22 ملیۆن، نه‌وره‌س زه‌رار 26 ملیۆن و عومه‌ر عامر 29 ملیۆن و500 هزار دینارن كو ئه‌ڤه یێن وه‌رزه‌ك و نیڤا نه، ئه‌ڤ كۆژمه هه‌موو ژی ل دووڤ گرێبه‌ستێن مه یێن باوه‌رپێكری و ئیمزا هاتینه په‌سه‌ند كرن و بتنێ مه مافێ خوه دڤێت نه زێده‌تر، له‌وما دبینم ئه‌ڤ كارگێریه یا گه‌نج و تێگه‌هشتینه ئه‌ز باوه‌رێ دا مه دێ چاره‌كه‌ن و داخوازا مه ژ پارێزگارێ نوكه و یێن به‌ری دووڤچوونا ئاریشا مه بكه‌ن ژبه‌ركو مه ژی خزمه‌تا یانا دهۆكێ ب سه‌رفه‌رازی كریه و پێنچ ناسناڤێن ئیراقێ بده‌ستڤه ئیناینه ئانكۆ پشكه‌كا دیرۆكی نه بۆ یانا دهۆكێ و پارێزگه‌هێ.
