بابه‌لیسكا ده‌ست ژ كاركێشانێ سه‌ر راهێنه‌ران دا گرت
ئه‌ڤرۆ، قه‌یس وه‌یس
پشتی ب دووماهی هاتنا یاریێن گه‌ڕأ پێنجێ ژ خولا پلا نایابا ئیراقێ یا ته‌پا پیێ كارگێریێن چه‌ند یانه‌یێن وه‌رزشی هند ده‌لیڤه نه دا راهێنه‌رێن تیمێن خوه یێن ته‌پا پێی د خولێ دا ژبه‌ر ئه‌وان ئه‌نجامێن لاواز كو ب فه‌رمی بهێنه دوورخستن یان ژی داخوازا ده‌ست كاركێشانێ ژێ هاتبنه كرن هه‌مبه‌ری وێ هنده‌ك یانه‌یێن دی ده‌لیڤه‌یا دووماهیێ داینه راهێنه‌رێن خوه.
راهێنه‌رێ ئێكێ یێ ده‌ست ژ كاركێشایی یێ یانا دیوانیه بوو ئه‌و ژی قوسه‌یی مونیر ئه‌وێ به‌ری ده‌ستپێكرنا خولێ ب چه‌ند رۆژه‌كا ل سه‌ر گڤاشتنێن كارگێریا یانێ نه چاربوو ده‌ست ژ كارێ خوه به‌رده‌ت و ل جهێ وی سامر سه‌عید هاتبوو دانان، راهێنه‌رێ دویێ یێ یانا هه‌ولێرێ بوو یێ سوری نزار مه‌حرۆس ئه‌وێ پشتی بۆرینا چار گه‌ڕان نه‌شیایی چو خالان ده‌ستڤه بینت كو چار خوساره‌تی ل دووڤ ئێك تۆماركرن وه‌كو ده‌ستپێكه‌كا خراب بوو یا كوڕێن قه‌لا و مناره ل جهێ وی غازی فه‌هد بهێته دانان، ده‌ست ژ كاركێشانا سێیێ یێ یانا زاخۆ بوو ئه‌و ژی حه‌مزه هادی پشتی بۆرینا چار گه‌ڕا ب تنێ ئێك سه‌ركه‌فتن ئینابوو، ل جهێ وی حه‌یده‌ر عه‌بدولئه‌میر هاتیه ده‌ستنیشانكرن، راهێنه‌رێ چارێ یێ یانا نه‌فت یا به‌غدایی بوو حه‌سه‌ن ئه‌حمه‌د ئه‌وێ ژ پێنچ یاریان ب تنێ وه‌كهه‌ڤیه‌ك و چار خوساره‌تی تۆماركرین بوو ئه‌گه‌ڕ كارگێریا یانێ ب رازیبوونا هه‌ردو لایه‌نا گرێبه‌ستا وی بهێته هه‌لوه‌شاندن ل جهێ وی حه‌كیم شاكر بهێته دانان، پێنه‌ڤێت پرۆسێسا ده‌ست ژ كاركێشانا راهێنه‌ران هه‌تا ڤێرێ نابیت و خول یا درێژه پێشبینیا گه‌له‌ك راهێنه‌رێن دی ژی هه‌بن ل دووڤ ئاست و ئه‌نجامێن یانه‌یێن پشكدار د خولێ دا.
