بزاڤێن دوورخستنا عه‌دنان درجالی هاتینه كرن
ئه‌ڤرۆ،
ل دووڤ ژێده‌رێن رۆژنامه‌ڤانی ل باژێرێ به‌غدا بزاڤێن مه‌زن ژلایێ چه‌ند ژ ده‌سته‌كا گشتی یا ئێكه‌تیا ته‌پا پێی یا ئیراقێ هاتینه كرن ژبۆ دوورخستنا سه‌رۆكێ ئێكه‌تیێ و وه‌زیرێ به‌رێ یێ وه‌رزش ولاوێن ئیراقێ عه‌دنان درجالی و دبیت هه‌تا دووماهیا ڤێ حه‌فتیێ بابه‌ت ئێكلا بیت.
ئه‌ڤ بابه‌ته هاتیه سه‌رهلدان پشتی حوكمه‌تا نوو یا ئیراقێ ب سه‌رۆكاتیا محه‌مه‌د ئه‌لشیاعی هاتیه پێكئینان و پۆستێ وه‌زاره‌تا وه‌رزش و لاوێن ئیراقێ ژ عه‌دنان درجال هاتیه وه‌رگرتن بۆ ئه‌حمه‌د ئه‌لمبرقع، ئه‌ڤچه‌نده بوو ده‌لیڤه‌یه‌ك كو هنده‌ك یانێن پلا نایاب ل گه‌ل چه‌ند ژ لایه‌نێن پشكدار ل گه‌ل ده‌سته‌كا گشتی بزاڤێنن مه‌زن كریه كو پۆستێ سه‌رۆكێ ئێكه‌تیا ته‌پا پێی یا ئیراقێ ژی ژ عه‌دنان درجالی بهێته وه‌رگرتن،
ل دووڤ په‌یره‌وێ په‌سه‌ندكری ل 25ێ كانوونا ئێكێ یا بهێت دێ كۆمبوونا ده‌سته‌كا گشتی یا ئێكه‌تیا ته‌پا پێی یا ئیراقێ هێته ئه‌نجامدان ژبۆ خواندنا راپۆرتێن سالانه یێن دارایی و كارگێری و گه‌نگه‌شه ل سه‌ر بابه‌تێن جودا هێنه كرن، لێ ئه‌و لایه‌نێن بزاڤێ دكه‌ن عه‌دنان درجال بهێته درووخستن ل گه‌ل وه‌زیرێ وه‌رزش و لاوان كۆمبوون كرینه و دبیت هه‌تا ده‌هێ ڤێ هه‌یڤێ ب نڤێساره‌كا فه‌رمی ئاراسته‌یی ئه‌میندارێ گشتی یێ ئێكه‌تیا ته‌پا پێی یا ئیراقێ بكه‌ن كو بابه‌تێ دوورخستنا عه‌دنان درجال بهێته ڤه‌كرن، لێ هه‌كه چو نڤێسار نه هاتنه ئاراسته‌كرن هه‌تا پشتی ده‌هێ هه‌یڤێ چو مه‌ترسی ل سه‌ر دوورخستنا وی نابن، له‌وما بریاره ئه‌ڤرۆ عه‌دنان درجال ل گه‌ل سه‌رۆكێن یانه‌یێن پلا نایاب كۆمبیت.
