ب پلانه‌كا رێكخستی دهۆك دێ مفایی ژ راوه‌ستیانا خولێ بینت
ئه‌ڤرۆ،
تیما ته‌پا پێی یا یانا دهۆك ب پلانه‌كا رێكخستی به‌رنامه دانایه بۆ چاوانیا باشترین به‌رهه‌ڤیێن تیمێ و مفا وه‌رگرتن ژ راوه‌ستیانا خولێ بینت پشتی ئێكه‌تیا ته‌پا پیێ یا ئیراقێ بڕیار دایی یاریێن گه‌ڕا شه‌شێ ژ خولا پلا نایاب بۆ 24ێ ڤێ هه‌یڤێ بهێنه پاشخستن ئه‌وا چاڤه‌ڕێ بوو ل ئه‌ینیا بۆری هاتبانه كرن، پێخه‌مه‌ت ده‌لیڤه‌دان بۆ هه‌لبژارتیێ ئێكێ یێ نشتیمان ژبۆ ئه‌نجامدانا دو یاریێن هه‌ڤالینی ل گه‌ل هه‌لبژارتیێ مه‌كسیك و ئیكۆادۆر ئه‌و دێ ل نه‌ه و 12ێ ڤێ هه‌یڤێ هێنه كرن خوه به‌رهه‌ڤكرن بۆ قاره‌مانیا كه‌نداڤی یا عه‌ره‌بی ئه‌وا بڕیاره ل شه‌ش هه‌تا 19ێ كانوونا ئێكێ یا سالا 2023ێ پارێزگه‌ها به‌سرا مێڤانداریا وێ كه‌ت.
ل دۆر پلانا رێكخستی و به‌رنامه‌یێ هاتیه دانان سلێمان ره‌مه‌زان راهێنه‌رێ تیما دهۆكێ بۆ ئه‌ڤرۆ گۆت: ژبۆ باشترین به‌رهه‌ڤی و مفا وه‌رگرتن ژ راوه‌ستیانا خولێ وه‌كو كادرێ راهێنانێ ل گه‌ل كارگێریا یانێ كۆمبووینه پێخه‌مه‌ت دانانا پلانه‌كا رێكخستی به‌ری بكه‌ڤینه د ناڤ هه‌ڤڕكیێن خولێ دا، له‌وما وه‌كو كادرێ راهێنانێ دێ بزاڤێ كه‌ین هه‌كه كه‌مپه‌ك بهێته رێكخستن هه‌ر ئه‌ڤرۆ دێ ده‌ست پلانا خوه كه‌ین ئه‌و ژی دێ ل سه‌ر چه‌سته‌یێ یاریزانان راوه‌ستیێن ب شێوێ پراكتیكی كار بۆ بلندكرنا چه‌سته‌یێ یاریزانی بهێته كرن، هه‌ردیسان ئه‌و خه‌له‌تیێن هه‌ر پێنچ گه‌ڕێن بوری دا مه كرینه خال بۆ وێ یه‌كێ د ماوێ راوه‌ستیانا خولێ هه‌موویا چاره‌سه‌ربكه‌ین و هه‌روه‌سا ئه‌نجامدانا چه‌ند یاریێن هه‌ڤالینی و پشكداریكرنا ئه‌وان یاریزانێن یه‌ده‌ك و دانانا چه‌ند پلانێن دی ژبۆ هندێ به‌ری یاریا خوه یا بهێت ل 24ێ هه‌یڤێ باشترین شێوه به‌رهه‌ڤبین.
بۆ زانین تیما یانا دهۆك د پێنچ یاریێن بوری دا دو سه‌ركه‌فتن و سێ وه‌كهه‌ڤی ئیناینه ب نه‌ه خالان رێزا پێنجێ دهێت، ئه‌وا تیما جه‌ویه ب 13 خالان، زه‌ورا ب12 و حدود ب11 خالان رێزێن دویێ و سێیێ دهێن، یاریا بهێت دهۆك دێ ل به‌غدا بیته مێڤانا یانا ته‌له‌به.
