وه‌رزشڤانێن دێرین: دێ سۆپرایزێن نه‌چاڤه‌ڕێ كری د مۆندیالێ دا هه‌بن
راپۆرت، شاهۆ فه‌رید:
وه‌كو دیار ئه‌ڤرۆ رۆژا سێیێ ژ جاما جیهانی مۆدنیالا قه‌ته‌ر 2022ێ به‌رده‌وامه و هه‌ڤڕكی بۆ ده‌ستڤه ئینانا سێ خالێن ده‌ستپێكێ دناڤبه‌را هه‌لبژارتیێن مه‌زن و بچووك دا به‌ر ب كۆپیتكێ یه پشتی بۆ ماوێ چه‌ندین هه‌یڤان به‌رهه‌ڤی بۆ ڤێ قاره‌مانیێ كرین، وه‌كو پلانا رۆژانه رۆژناما ئه‌ڤرۆ به‌رده‌وامه ل سه‌ر وه‌رگرتنا بۆچوونێن جودا ژ وه‌رزشڤانێن دێرین، شرۆڤه‌كاران، یاریزان و راهێنه‌ران ل دۆر مۆندیالێ ژوانا ئه‌ڤ راپۆرته بوویه.
ل ده‌ستپێكێ سعید خه‌لیل ئه‌ندامێ ئێكه‌تیا ته‌نسا ئه‌ردی یا ئیراقێ و وه‌رزشڤانێ دێرین یێ پارێزگه‌هێ گۆت: موندیالا ڤێ جارێ دی هه‌موو لایه‌كێ ڤه نموونه‌بیت، دڤێت ل دیرۆكا هه‌لبژارتیێن خودان شیان و ئاست ڤه‌گه‌ڕیێن هه‌رده‌م به‌ربژارن هه‌كه ئاستێ وان یێ خراب ژی بیت و چانسێ هه‌لگرێن مۆندیالێ پتره ب ده‌ستڤه‌ئینانێ لێ دبیت سۆپرایزێن نه چاڤه‌رێ كری هه‌بن، هه‌لبژارتیێن ئه‌فریقیا دێ بنه هه‌سپێن مۆندیالێ وه‌كو سینیگال، مه‌غرب و كامێرون كو د بینم دێ ئاسته‌كێ باش پێشكیش كه‌ن، سعودیه و قه‌ته‌ر وی ئاستێ پێدڤی دا نه‌بن، ئه‌مریكا باشوور به‌ستن دانایه ل سه‌ر به‌هره‌یێ و پێشه‌كاریی له‌وما چار به‌شه بێ به‌هر ژ موندیالێ، ئۆرۆپا ب خاندنا زانستێ ته‌پاپێی خوه بهیزترلێ كریه، وه‌كو پشته‌ڤانه‌كێ هوله‌ندا بێ چانس ترین هه‌لبژارتی سێ جارا یاریا دووماهیێ تووشی كه‌تنێ بوویه، هوله‌ندا هه‌رده‌م قوتابخانه‌یه چاڤه‌رێ ئه‌نجامێن دلخوه‌شكه‌رین، ئه‌و جوش و خروشا خۆلا ئنگلترا دا هه‌یی چو هه‌لبژارتێ نینه.
ژلایێ خوه‌ڤه ماهر ئیبراهیم وه‌رزشڤانێ دێرین گۆت: موندیالا قه‌ته‌ر دێ یا جودا بیت ب هه‌موو لایان ڤه، ئه‌نجامێًن نه‌چاڤه‌رێكری و سۆپرایز دێ هه‌بن، ئه‌زدبینم ئه‌و هه‌لبژارتێن خه‌لك پێ سه‌رسومان دبیت و ببنه وه‌كو هه‌سپێ ره‌ش دێ مه‌غرب ودانیمارك بیت، وه‌كو من سه‌حكریه یاریێن مه‌غرب د ڤاڤارتنادا و هه‌بوونا چه‌ندین ستێرێن پێشه‌كار دێ شێت ژ قۆناغا كومان ده‌ربازكه‌ت لێ دوور نینه گه‌له‌ك نه‌چیت، ئه‌و هه‌لبژارتێن دیرۆكا مۆندیالێ هه‌یی و خودان ناسناڤ حه‌زا وانه دووباره موندیالێ ببه‌ن، هنده‌ك هه‌لبژارتی تنێ حه‌زا پشكداریێ هه‌یه، گه‌له‌ك جاران ده‌ربازبوون بۆ هه‌لبژارتیێـن بهیز دبیته دو چه‌مسه‌ر یا ئێكی ئه‌رجه‌نتین، به‌رازیل، فه‌ره‌نسا، ئسپانیا و به‌لجیكا، یادویێ ئه‌لمانیا، ئنگلیز و پورتوگال ئه‌ڤه دێ قوناغا 16و هه‌شتێ و دووماهیێ هێن، وه‌كو پشته‌ڤانه‌كێ به‌رازیل ژ سالا 1982 وه‌ره سه‌حه‌كه یاریێن وێ، د دیرۆكا به‌رازیلێ دا ده‌مێ ڤاڤارتنا هه‌ڤرك نه‌بیت موندیالێ دكه‌ڤیت، ئه‌و ئه‌نجام وئاستێ باش پێشكێش ناكه‌ن، موندیالا ده‌ربازبوویی ئنگلته‌را یا نێزیك بوو لی یاریا به‌ری دووماهیێ ئاستێ خوه ده‌ست دا ، ئه‌ز مێسی پتری ژ رونالدویی بینم نیزیكتر بۆ ده‌ست ڤه‌ئینانا موندیالێ، راستی دێ نه‌خوه‌ش بیت ئه‌ڤ هه‌ردو ستێره بێ موندیال كاروانێ وان ب دووماهی بهێت.
