د.ئاڤا غازی، تایبه‌تمه‌ندێ نه‌خۆشیێن ده‌روونی: هنده‌ك نیشانێن ل سه‌ر له‌شی ئاماژێ ب نه‌خۆشیێن ده‌روونی دده‌ن
ئه‌ڤرۆ، به‌رپه‌رێ ساخله‌میێ:
د.ئاڤا غازی، تایبه‌تمه‌ندێ نه‌خۆشیێن ده‌روونی دیاركر كو هنده‌ك جارا هنده‌ك نیشان ل ده‌ڤ مرۆڤی ده‌ردكه‌ڤن و نیشانێن جه‌سته‌ی نه، به‌لێ هه‌بوونا وان گرێدای ده‌روونێ مرۆڤی نه، بۆ نموونه، سه‌رئێشان، گێژبوون، گه‌له‌ك جارا نه‌خۆش دبێژیت بێهنا من ته‌نك دبیت، دلقوتان، تێكچوونا مه‌عیدێ و عێلنجی، هنده‌ك جارا دلرابوون، له‌رزین، ته‌زینك سه‌ر له‌شیدا، هنده‌ك جورێن لڤینان ل ده‌ست و پێیان، نه‌مانا ده‌نگی و كۆمه‌كا نیشانێن دی یێن جه‌سته‌ی یێن جودا جودا هه‌نه كو هنده‌ك جارا ل ده‌ڤ هنده‌ك كه‌سان ده‌ردكه‌ڤن و ئه‌گه‌ر بۆ لایه‌نێ ده‌روونی ڤه‌دگه‌رن.
تایبه‌تمه‌ندێ نه‌خۆشیێن ده‌روونی دیاركر ، هنده‌ك تێبینی ل سه‌ر ڤی باره‌تی هه‌نه، ژوانژی، راسته ره‌نگه ئه‌ڤ نیشانه هنده‌ك گوهۆرین بن ل سه‌ر لایه‌نێ ده‌روونی، به‌لێ پێدڤیه مرۆڤ یێ هشیاربیت زوو بڕیارێ نه‌ده‌ت و بێژیت ئه‌ڤه ره‌وشه‌كا ده‌روونی یه، چونكو دبیت هنده‌ك نه‌خۆشیێن دل و هناڤان، یان ده‌ماران ل پشت ڤان نیشانان هه‌بن، له‌ورا پێنگاڤا ئێكێ ئه‌وه كو نۆشدارێ تایبه‌تمه‌ندێ دل و هناڤان نه‌خۆشی ببینیت و ئه‌و ئێكلا كه‌ت كو نه‌خۆشی چو نه‌خۆشیێن دل و هناڤان نینن، هه‌كه نیشان گرێدای مه‌ژی و ده‌ماران بیت، پێدڤیه نۆشدارێ مه‌ژی و ده‌ماران خوه ئێكلا بكه‌ت و هه‌كه چ نه‌خۆشیێن گرێدای وان نه‌بن، پێدڤیه هه‌لسه‌نگاندنه‌ك بۆ بوارێ نه‌خۆشی یێ ده‌روونی بهێته كرن و ل دووڤ ئه‌نجامێن وان نۆشدارێ تایبه‌تمه‌ندێ ده‌روونی دێ بڕیارێ ل سه‌ر چاره‌سه‌ریێ ده‌ت.
هه‌روه‌سا دیاركر كو تێبینیا دوێ هنده جارا نۆشدارێ نایبه‌تمه‌ندێ دل و هناڤان یان یێ ده‌ماران شێوازه‌كی ده‌ردبرن كو وی نه‌خۆشی چ نه‌خۆشیێن گرێدای وان نینن و دێ بێژیته كه‌سوكارێن وی كو وی كه‌سی چ نه‌خۆشی نینن و گۆت: من دڤێت ئاماژێ بده‌م كو ل وی ده‌می مه‌ره‌ما نۆشداری ئه‌وه و د تایبه‌تمه‌ندیا وی دا چ نه‌خۆشی نینن، به‌لێ رامان ژێ ئه‌و نینه وی چ نه‌خۆشیێن ده‌روونی نه‌بن، دبیت ئه‌و نیشانێن ل سه‌ر له‌شێ وی ده‌ركه‌فتین گرێدای ده‌روونێ وی بن و هزرێن ب مه‌ترسی بۆ په‌یداببن، له‌ورا ل وی ده‌می هه‌لسه‌نگاندنه‌ك بو لایه‌نی َ وی یێ ده‌روونی بهێته‌كرن.
د.ئاڤا غازی، ئه‌وژی دیاركر كو ده‌مێ كه‌سوكارێن وی گوه ل نۆشدارێ دل و هناڤان دبیت و دبێژیت چ نه‌خۆشی لێ نینن، ئه‌و دێ هزر كه‌ن كو ئه‌ڤ نه‌خۆشه ژ قه‌ستا وه‌دكه‌ت و گۆتژی: ل ڤێرێ من دڤێت ئاماژێ بده‌مێ داكو ئه‌ڤ ئاریشه مه‌زنتر لێ نه‌هێت، پێدڤیه نۆشداره‌كێ تایبه‌تمه‌ندێ ده‌روونی نه‌خۆشی ببینیت و ل دووڤ هه‌لسه‌نگاندنا ره‌وشا وی یا ده‌روونی، چاره‌سه‌ریا وی بهێته‌كرن.
