ناسناڤێ كوردستانێ ب هێزا گه‌نجێن زاخۆ بوو
ئه‌ڤرۆ، زاخۆ، عه‌لی حاجی:
د داخویانیه‌كێ دا سه‌رپه‌رشتێ تیما باسكێت بۆلا یانا زاخۆ دیاركر ده‌ستڤه ئینانا خولا پلا نایابا كوردستانێ ب ڤالاتی نه هاتیه و ریكۆردی ب ناڤێ خوه تۆماركر.
زێده‌تر عه‌بدولستار عه‌لی گۆت: هه‌رچه‌نده ده‌ستپێكا خولا پلا نایاب ب ئارمانجا ده‌ستڤه ئینانا ناسناڤی پشكداربووین و ئه‌و پێكهاتیێ مه هه‌یی تێرا وێ چه‌ندێ دكر كو دێ ب جهئینن و ناسناڤێ خولێ ب ڤالاتی نه هاتیه به‌لكو ب هێزا گه‌نجێن زاخۆ بوویه، هه‌ر یاریه‌كا دهاته كرن شیان و مۆراله‌كا بلند ئه‌نجامداینه و نه‌هێلا چو یاریان ژی خوساره‌ت بین و شیاین ریكۆردی ب ناڤێ یانا زاخۆ تۆماربكه‌ین كو ناسناڤی بینن و چو خوساره‌تی نه‌بن، سه‌رباری هه‌ڤڕكیێن بهێز دهاتنه كرن و تیما مه یا پشكدار د خولا ئیراقێ ژی دا گڤاشتن ل سه‌ر هه‌بوون و چه‌ند یاریزانێن باژێرێ زاخۆ ماندیبوون ژی دیتن، یا گرنگ ده‌لیڤه‌كا مه‌زن دا یاریزانێن گه‌نج ئه‌وێن ئاست و شیانێن خوه دیاركرین و باشترین ده‌ستكه‌فت ژی ئینایی.
ناڤهاتی ئه‌وچه‌نده ژی دیاركر ده‌ستڤه ئینانا خولا كوردستانێ بۆ جارا چارێ تشته‌كێ تایبه‌ته بۆ وان ژبه‌ركو نڤشێ نوو یێ یاریزانێن باسكێت بۆلا زاخۆ شیان ببنه پێگه‌هه‌كێ باش بۆ باسكێت بۆلا زاخۆ د سالێن بهێت دا دێ گه‌له‌ك مفایی ژێ وه‌رگرین.
