دهۆك ب خاله‌كێ ژ به‌سرا ڤه‌گه‌ڕیا
ئه‌ڤرۆ،
تیما ته‌پا پیێ یا یانا دهۆك ب خاله‌كێ ژ یاریگه‌ها فیحا ل باژێرێ به‌سرا ڤه‌گه‌ڕیا پشتی ل گه‌ل مێڤاندارا خوه یانا نه‌فت ئه‌لبه‌سرا ب گۆله‌كێ وه‌كهه‌ڤ بووی، د یاریا واندا ئه‌وا دوهی ژ چارچووڤێ هه‌ڤڕكیێن گه‌ڕا هه‌شتێ ژ خولا پلا نایابا ئیراقێ هاتیه كرن.
د ماوه‌یێ هه‌ردو نیڤان دا تیما ئه‌لهۆیێن چیا شیا ئاسته‌كێ مه‌زن نیشان بده‌ن و یاریزانێن وێ كۆمه‌كا ده‌لیڤه‌یێن گۆلكرنێ ژ ده‌ستدان، د نیڤا ئێكێ دا ئاسته‌كێ باش هاته نیشان دان لێ چو گۆل نه هاتنه تۆماركرن، د نیڤا دویێ دا ئه‌وا دهێته هژمارتن یا راهێنه‌ران، سلێمان ره‌مه‌زان راهێنه‌رێ دهۆكێ پشتی ل گه‌ل یاریزانان كۆمبوویی ب پلانا خوه یاریزانێن وان شیان د نیڤا دویێ دا كۆنترۆله‌كا باش ل سه‌ر یاریێ بكه‌ن و چه‌ندین ده‌لیڤێن گۆلكرنێ ژ ده‌ست بده‌ن ئه‌وێن ژلایێ یاریزانان زاكێری یانیگ، عه‌مار عه‌بدولحسێن، برێنس ئۆبۆكۆ و ژیار گۆڤه‌ند، ل سه‌ر ئه‌ڤان گڤاشتنێن به‌رده‌وام یاریزانێ تیما دهۆكێ برێنس ئۆبۆكۆ شیا گۆلا ئێكێ د خوله‌كا 59ێ دا تۆماربكه‌ت، لێ پشتی ڤێ گۆلێ و ده‌رئه‌نجامێ خه‌له‌تیه‌كا هێلا به‌ره‌ڤانیێ یاریزانێ نه‌فت ئه‌لبه‌سرا ئه‌حمه‌د جه‌لال شیا مفایی ژێ وه‌ربگریت و گۆلا وه‌كهه‌ڤیێ و راستڤه‌كرنا ئه‌نجامی د خوله‌كا 64ێ دا بینت، د ماوه‌یێ خوله‌كێن مایی دا یاریزانێن دهۆكێ به‌رده‌وامی دا گڤاشتنان و چه‌ندین گۆلێن مسۆگه‌ر ژ ده‌ستدانه و مفا ژ ئه‌وان ده‌لیڤێن خوه نه وه‌رگرتن هه‌تا فیركا دادڤانی ب وه‌كهه‌ڤیا هه‌ردو تیمان ب دووماهی هات.
