د مۆندیالا قه‌ته‌ر دا
ئه‌ڤرۆ
ل شه‌ڤا ئه‌ینیا بوری دو یاریێن گرنگ و بهێز ژ چارچووڤێ قۆناغا هه‌شتێ یا قاره‌مانیا جیهانێ مۆندیالا قه‌ته‌ر 2022 هاتنه ئه‌نجامدان، تێدا هه‌لبژارتیێ به‌رازیل ئه‌وا ئێك ژ بهێزترین به‌ربژارێن ناسناڤی خاترا خوه ژ مۆندیالێ خواست پشتی هه‌لبژارتیێ كرواتیا سۆپرایزه‌كا نه چاڤه‌ڕێ كری پێشكێشی وێ كری ب سه‌ركه‌فتی ب لێدانێن په‌نه‌لیتا و ده‌ربازبوو قۆناغا چارێك دووماهیێ ب ئه‌نجامێ 4-2 گۆلان پشتی یاری ب هه‌ردو چارێكێن زێده‌كری ژی ب وه‌كهه‌ڤیا گۆله‌كێ ب دووماهی هاتی، گۆلا به‌رازیل ژلایێ نیماری د خوله‌كا 105 دا تۆماركری لێ هێرشبه‌رێ كرواتیا برۆنۆ بێتكۆڤێچ شیا د خوله‌كا 117ێ دا گۆلا وه‌كهه‌ڤیێ بینت، ژلایێ خوه‌ڤه هه‌لبژارتیێ ئه‌رجه‌نتین ب لێدانێن په‌نه‌لیتا ب سه‌ركێشیا لیۆنێل مێسی به‌رده‌وامی دا خه‌ونا خوه و شیاین ب سه‌ركه‌فن ل سه‌ر هه‌لبژارتیێ هۆله‌ندا ب 4-3 گۆلان، پشتی یاری ب دو گۆلان وه‌كهه‌ڤی ب دووماهی هاتی، گۆلێن ئه‌رجه‌نتین ژلایێ یاریزانان ناهویێل مۆلینا و مێسی د خوله‌كێن 35 و 73ێ دا تۆماركرن، گۆلێن هۆله‌ندا ژلایێ یاریزان فۆت ڤیگۆرست د خوله‌كێن 83 و 90+11 دا تۆماركرن، بۆ زانین هه‌ردو هه‌لبژارتیێن كرواتیا و ئه‌رجه‌نتین دێ ل سێ شه‌مبیا بهێت ژ قۆناغا پێش دووماهیێ هه‌مبه‌ری ئێكبن.
رۆژنامێن به‌رازیل د تۆره‌نه
هه‌موو رۆژنامێن وه‌لاتێ به‌رازیل د نڤێسینێن خوه یێن دووماهی هژمارا دا به‌لاڤبووین ب تۆره‌یی ڤه هێرش كرینه ل سه‌ر راهێنه‌رێ هه‌لبژارتیێ وان تیتی كو ئه‌گه‌رێ سه‌ره‌كی یێ ژ ده‌ستدانا پلێتا ده‌ربازبوونێ یه بۆ پێش دووماهیا مۆندیالێ و ژ ده‌ستدانا هیڤیێن 20 سالێن بۆری كو ده‌ستڤه ئینانا ناسناڤێ شه‌شێ یه، رۆژناما جلۆبۆ ئای سپۆرت دیاركر هه‌ر ژ پشتی ده‌ستڤه ئینانا مۆندیالا 2002ێ به‌رازیل نه‌شیایه د مۆندیالێن دووڤدا خوه ژ ده‌ستێ هه‌لبژارتیێن ئۆرۆپا دا قۆرتالبكه‌ت، ل مۆندیالا 2006 ل گه‌ل فره‌نسا د قۆناغا چارێك دووماهیێ دا ب گۆله‌كێ خوساره‌ت بوو، ل مۆندیالا 2010 ل هۆله‌ندا و هه‌مان قۆناغ دا ب دو گۆلان به‌رامبه‌ر گۆله‌كێ توشی خوساره‌تیێ بوو، ل مۆندیالا 2014 پێش دووماهیێ دا هه‌مبه‌ری ئه‌لمانیا ب حه‌فت گۆلان به‌رامبه‌ر گۆله‌كێ خوساره‌ت بوو، هه‌روه‌سان د قۆناغا چارێك دووماهیێ دا هه‌مبه‌ری به‌لجیكا ب 2-1 تووشی خوساره‌تیێ بوو.
مێسێ نێزیكی خه‌ونا خوه بوو
ستێرێ ئه‌رجه‌نتینی لیۆنێل مێسی یێ 35 سالی هێدی به‌ر ب خه‌وانا خوه یا چه‌ندین سالان دبیت پشتی هه‌لبژارتیێ وان ده‌ربازبوویه قۆناغا پێش دووماهیێ و شیایه چه‌ند نمرێن پیڤایی بشكێنیت ئه‌و ژی، بوویه گۆلكه‌رێ دیرۆكی یێ هه‌لبژارتیێ خوه ب تۆماركرنا 10 گۆلان و گه‌هشته نمرا هه‌ڤالێ خوه گابریێل باتیستوتا و بوویه ئێكه‌م یاریزانێ ئه‌رجه‌نتین رێژا مه‌زن پشكداری تۆماركرنا گۆلان بوویه 10 گۆل تۆماركرن و حه‌فت گۆل به‌رهه‌ڤكرینه و هه‌كه شیا دو گۆلان تۆماربكه‌ت یان چێكه‌ت دێ بیته سه‌رێ لیستا جیهانێ وه‌رگریت هه‌مبه‌ری یاریزانێ ئه‌لمانی جێراد مۆله‌ر و كیرۆسلاڤ كلۆزه و یێ به‌رازیلی رۆنالدۆ ئه‌وێن 19 گۆل هه‌ین و چێكرین، لێ چاڤه‌ڕێ خه‌ونا خوه یا مه‌زنه ئه‌وژی مۆندیاله.
نهێنێن سه‌ركه‌فتنا كرواتیا
پرانیا بۆچوونێن شلۆڤه‌كارێن وه‌رزشی ل جیهانێ هوسا دیاركرینه كو چار ئه‌گه‌ر و نهێنیێن سه‌ركه‌فتنا هه‌لبژارتیێ كرواتیا لسه‌ر هه‌لبژارتیێ به‌رازیل هه‌نه و بڤی ره‌نگی.
ئێك: ئاست بلندیا گۆلپارێزێ كرواتیا، ل دووڤ رێژا هاتیه دیاركرن كو گۆلپارێزێ كرواتیا دۆمینیك لیڤاكۆڤێتچ شیا هه‌مبه‌ری 10شۆتێن گۆلكرنێ ب راوه‌ستیێن و نه‌هێلیت ببنه گۆل ژوانا دو لێدانێن په‌نه‌لتیان.
دو: سیناریویا كرواتیا، ئه‌و پلانا هه‌لبژارتیێ كرواتیا ل گه‌ل به‌رازیل دڤیا و سیناریویا قۆناغێن ڤه‌بڕ دوباره كره‌ڤه كو یاری به‌ر ب ده‌مێن زێده‌كر بچیت و دووڤدا بۆ لێدانێن په‌نه‌لتیا، ئه‌ڤ سیناریویه د شه‌ش یاریێن مۆندیالێن بۆری دا كو د قۆناغێن ڤه‌بڕ دا شیا ژ سه‌رجه‌مێ واندا پێنچ یاریان سه‌ركه‌فتنێ بینت بتنێ ئێك جار د یاریا دووماهیێ دا ل گه‌ل فرنسا ل مۆندیالا 2018ێ نه‌شیا سه‌ركه‌ڤیت و مۆندیال ژ ده‌ستدا.
سێ: نه سه‌رخوه‌یا هێرشبه‌رێن به‌رازیل، زێده‌تری 10 شۆتێن بله‌ز و بێ مفا وه‌رگرتن هێرشبه‌رێن به‌رازیل نه شیان تیما خوه پێشبێخن ژبلی گۆلا نه‌یماری نه بیت ئه‌وا د خوله‌كا 105 دا هاتیه تۆماركرن،
چار: فه‌لسه‌فا راهێنه‌رێ كرواتیا، زلاتكۆ دالێتچ شێوازێ یاریێ ل گه‌ل به‌رازیل جودا دانابوو پێخه‌مه‌ت یاریزانێن سامپا زیكا ب وه‌ستیێن، ب پشتبه‌ستن ل سه‌ر زێده‌كرنا رێژا پاسا هه‌رده‌مێ ته‌په د ده‌ستێ یاریزانێن وی دابن و هه‌موو رێك ل یاریزانێن به‌رازیل بهێنه گرن ئه‌و ده‌مێ ته‌په ده‌ستێ وان دا نه‌بیت و یاریزانێن وان بهێنه هێلا به‌ره‌ڤانیێ كو ئه‌ڤچه‌نده بوو ئه‌گه‌ر هه‌موو رێك ل به‌رازیلێ هاتنه گرن.
به‌رازیلا ب ستێر و بێ راهێنه‌ر
وه‌كو دیار وه‌لاتێ به‌رازیل خودان كۆمه‌كا مه‌زن یا به‌هره‌مه‌ند و یاریزانێن ستێره، پێكهاتیێ مۆندیالا 2006ێ باشترین یاریزان دناڤ دا هه‌بوون لێ نه‌شیان چو ده‌ستكه‌فتان بینن، ل مۆندیالا 2010 ژی هه‌مان بێ ئۆمێدی بوو، ل مۆندیالا 2014ێ ژی به‌رده‌وامی دا بێ هیڤییان تایبه‌ت دناڤ ئه‌رد و جه‌ماوه‌رێ خوه دا ل گه‌ل ئه‌لمانیا و هۆله‌ندا خوسارت بوو، لێ هه‌كه دۆڤچوونێ بكه‌ین دێ دیاربیت د ئه‌ڤان مۆندیالان دا راهێنه‌رێ شاره‌زا نه‌بوویه، شلۆڤه‌كارێن وه‌رزشی ئه‌گه‌ڕێن مه‌زن یێ ئه‌ڤان شكه‌ستنا ڤه‌دگه‌ڕێنه نه‌بوونا راهێنه‌ره‌كی بزانیت چه‌وا سه‌ره‌ده‌ریی ل گه‌ل پێكهاتیه‌كێ پری ستێر بكه‌ت و یا دروست ئه‌وه راهێنه‌ران بۆ خولێن ئۆرۆپا بهێنه هنارتن ژبۆ بلندكرنا ئاستێ وان.
