ره‌نا به‌ره‌كه‌ت: بتنێ رێزێن ئێكێ و دویێ ب ده‌ستخوه‌ڤه دئینم
ئه‌ڤرۆ، هه‌رهین محه‌مه‌د:
د دیداره‌كێ دا ره‌نا به‌ره‌كه‌ت یاریزانا یاریا غاردانێ بۆ ئه‌ڤرۆ گۆت: غاردان حه‌زا من بوون و شیانێن مه‌زن هه‌نه لێ من نه دزانی دێ ل كیڤه و كه‌نگی و چه‌وا ده‌ستپێكه‌م.
هه‌روه‌سا ناڤهاتی دیاركر پشتی ماراسۆنه‌ك ل باژێرێ ئاكرێ هاتیه ڤه‌كرن بۆ من ده‌لیڤه هاته دان و د ناڤ سێ سه‌د و پێنجی كه‌سان بۆ درێژییا سێ كیلو مه‌تران شیام رێزا ئێكێ ب ده‌ستخوه ڤه بینم، بۆ زانین من پشكداری گه‌له‌ك ماراسونان دا بێ پشته‌ڤانی كریه، ل باژێرێن ئاكرێ، دهۆكێ، هه‌ولێرێ، سلێمانیێ و كه‌ركووكێ من پلێن باش ده‌ستخوه ڤه ئیناینه و نوكه به‌رهه‌ڤێن خوه بۆ دو قاره‌مانیا ل هه‌ولێرێ و به‌غدا دكه‌م.
هه‌ردیسان ره‌نایێ گۆتژی: وه‌كو یاریزانا غاردانا درێژ و هه‌تا نوكه من ئه‌نجامێن ئێكێ و دویێ ده‌ستخوه‌ڤه ئینایه و هه‌كه من پیشته‌ڤانی هه‌بیت و راهێنه‌ره‌ك ب پشتراستی دێ ئه‌نجامێن باشتر ده‌ستخوه ڤه ئینم و گه‌له‌ك كچێن وه‌كو من زیره‌ك هه‌نه، لێ پشته‌ڤانی ناهێته‌كرن، له‌ورا دبه‌رزه‌نه، چو جوداهی نینه دناڤبه‌را كور و كچان دا بۆ یاریا غاردانێ و مه كچێن خودان شیان هه‌نه هه‌كه كار ل سه‌ر بهێته‌كرن و ئه‌ڤه ده‌مه‌كێ كێمه هاتیمه دناڤ یاریا غاردانێ دا و ئێكه‌م یاریزانا گوره‌پان و میدانم ل ئاكرێ و من ناڤه‌ژی بخوه چێكریه.
