شرۆڤه‌كاره‌ك: دوورخستنا دو یاریزانان ئه‌گه‌رێن خوساره‌تیا دهۆكێ بوون
ئه‌ڤرۆ،
د داخویانیه‌كێ دا وه‌حید ره‌شید شرۆڤه‌كارێ وه‌رزشی بو یاریا ته‌پا پێی ل پارێزگه‌ها دهۆكێ دیاركر دوورخستنا دو یاریزانێن تیما دهۆكێ ب كارتا سۆر ئه‌گه‌رێن خوساره‌تیا وان بوون ل گه‌ل یانا كه‌رخ، ئه‌وا ل ئه‌ینیا بوری یانه‌یا دهۆك ب دو گۆلان بێ به‌رامبه‌ر تووشی خوساره‌تیێ بووین ژ چارچووڤێ هه‌ڤڕكیێن گه‌ڕا نه‌هێ یا خولا پلا نایابا ئیراقێ یا ته‌پا پێی ل یاریگه‌ها یانه‌یا دهۆك هاتیه كرن.
زێده‌تر ناڤهاتی بۆ رۆژناما ئه‌ڤرۆ گۆت: هه‌رچه‌نده دوورخستنا ئێكێ ب كارتا سۆر یا یاریزانێ دهۆكێ چو كارتیكرنا به‌رچاڤ ل سه‌ر تیمێ نه كربوو لێ مخابن دوورخستنا دویێ یا كارتا سۆر دربه‌ك ب تیمێ كه‌ت و ئه‌ڤه چه‌نده ژی خه‌له‌تیا یاریزانان بوو سه‌رباری راهێنه‌ر سلێمان ره‌مه‌زان بزاڤ كرن ب كوهۆڕینا چه‌ند یاریزانان كونترۆلێ ل سه‌ر یاریێ بكه‌ت و نه‌هێلێت یانا كه‌رخ مفایی ژ ڤالاتیا وه‌ربگریت، لێ هژمارا كێم یا یاریزانێن دهۆكێ دناڤ یاریگه‌هێ دا زێده‌تر ده‌لیڤه بۆ یاریزانێن كه‌رخێ په‌یداكرن و شیان دو گۆلان د خوله‌كێن دووماهیێ دا تۆماربكه‌ن.
هه‌روه‌سان ناڤهاتی گۆت: د یاریێن بۆری دا تیما دهۆكێ ئاسته‌كێ گه‌له‌ك باش نیشان دابوو و هه‌تا یاریا ل گه‌ل كه‌رخ ژی یا باش بوو، دڤیابا یاریزانێن دهۆكێ ئه‌وڤچه‌نده به‌رچاڤ وه‌رگرتبا كو تیما دهۆكێ پێدڤی ب خالانه و ئه‌و ره‌فتاره دێ كارتیكرتنێ ل سه‌ر ئه‌نجامان كه‌ت، لێ شیانێن دهۆكێ د سنۆردارن و خول یا درێژه د ڤێت یاریزان یێ سه‌رخوه‌بیت.
بۆ زانین هه‌ردو یاریزانێن دهۆكێ نورۆ سۆلێ و هنگا محه‌مه‌د د خوله‌كا 28ێ و 53ێ دا ده‌رئه‌نجامێ یاریا زڤڕ ب كارتێن سۆر ژ یاریگه‌هێ هاتنه دوورخستن.
