سێمێل و گاره دناڤبه‌را گه‌ڤێن داكه‌فتنێ و هیڤیێن ده‌ربازبوونێ
ئه‌ڤرۆ،
بڕیاره سۆبه‌هی پێنچ شه‌مبی یاریێن گه‌ڕا شه‌شێ ژ خولا كوردستانێ بۆ یانه‌یێن پلا ئێك یا ته‌پا پێی بهێنه ئه‌نجامدان ئه‌وا 19 یانه هه‌ڤڕكیێ بۆ دو پلێتێن ده‌ربازبوونێ به‌ر ب پلا نایاب دكه‌ن، سێمێل دێ مێڤانداریا خانه‌قین كه‌ت و گاره دێ بیته مێڤانا زانكۆیا جیهان.
ل یاریگه‌ها خوه و دناڤ ئه‌رد و جه‌ماوه‌رێ خوه دا یانه‌یا سێمێل دێ مێڤانداریا یانه‌یا خانه‌قین كه‌ت و چاڤێ وێ ل سه‌ركه‌فتنا سێیێ یه و به‌رده‌وامی دانه به‌ر ب رێزێن پێشیێ و هه‌ڤڕكیێ بۆ پلێتا ده‌ربازبوونێ ئه‌وا نوكه ب حه‌فت خالان رێزا هه‌شتێ دهێت كو دناڤبه‌را وێ خودانا سه‌رێ لیستێ بتنێ چار خالن، ژلایێ خوه‌ڤه یانه‌یا خانه‌قین ژی تیمه‌كا رێكخستیه و بزاڤێن هه‌ڤڕكیێ بۆ رێزێن پێشیێ دكه‌ت ئه‌وا ب هه‌شت خالان رێزا شه‌شێ دهێت ئانكو ب تنێ خاله‌ك ل گه‌ل تیما پارێزگه‌هێ یا جودایه، دهێته چاڤه‌ڕێ كرن ئه‌ڤ یاریه بهێز بیت بۆ هه‌ردو تیمان.
ژلایێ خوه‌ڤه تیما یانه‌یا گاره ئه‌وا د كاودانه‌كێ نه‌خووش یێ دارایی دا ده‌رباز دكه‌ت ب خوون گه‌رم و خوه‌به‌خشیا یاریزان و كادرێ راهێنانێ دێ بنه مێڤانێن یانه‌یا زانكویا جیهان، نوونه‌را دویێ یا پارێزگه‌هێ ب دو خالان رێزا 19ێ و دووماهیێ دهێت و لبن گه‌ڤێن داكه‌فتنێ نه بۆ پلا دو، ژلایێ خوه‌ڤه ژی تیما زانكویا جیهان ژی لبن هه‌مان گه‌فا نه ئه‌وا ب سێ خالان رێزا 16ێ دهێت، ئه‌ڤ یاریه بۆ كوڕێن گاره یا بزه‌حمه‌ته و پێدڤی ب سه‌ركه‌فتنێ هه‌نه، ژ یاریێن دی یێن رۆژا پێنچ شه‌مبی، هه‌ولێر- بازیان، بابان- كویه، رانیه- برادۆست، یاریێن رۆژا ئه‌ینی، هه‌لۆ- پێشه‌سازی، خاك- برۆسك، قه‌لادزی- رزگاری، ره‌واندۆز- شۆرچه.
