حوكمه‌تا هه‌رێمێ دێ پشته‌ڤانیا دارایی ل یانه‌یا باتیفا هێته كرن
ئه‌ڤرۆ، زاخۆ، عه‌لی حاجی:
د داخویانیه‌كێ دا سه‌رۆكێ یانه‌یا باتیفا یا وه‌رزشی بۆ رۆژناما ئه‌ڤرۆ دیار كر رێڤه‌به‌ریا گشتی یا وه‌رزشی ل كوردستانێ پشته‌ڤانیا خوه بۆ یانه‌یا مه دیاركریه و ئه‌و چاڤه‌ڕێ نه پشتی سه‌رێ سالا نوو هاریكاریێن مادی وه‌ربگرن.
زێده‌تر ئه‌یهه‌م جامی گۆت: د نڤێسارا خوه دا وان داخوازا 50 ملیۆن دینارێن ئیراقی ژ حوكمه‌تا هه‌رێما كوردستانێ كرینه لێ رازه‌مه‌ندی ل سه‌ر پارڤه‌كرنا 30 ملیۆن دیناران هاتیه كرن بۆ یانێ و هه‌كه بهێنڤه‌دان نه‌با دا ئه‌وی كۆژمه‌یێ پاره‌یی وه‌رگرین، له‌وما پشتی ب دووماهی هاتنا بهێنڤه‌دانێ و رێكارێن كارگێری ئه‌و ب ژڤانن ب هاتنا سه‌رێ سالا نوو هاریكاریا حوكمه‌تا هه‌رێما كوردستانێ وه‌ربگرن كو دێ بیته باشترین پێنگاڤ ئه‌و بشێن پشكداریا خوه یا سه‌ركه‌فتی د خولا ته‌پا پێی بۆ یانه‌یێن پلا دو یا كوردستانێ دا بكه‌ن، هه‌ر دیسان داخوازا دابینكرنا ترۆمبێله‌كا تایبه‌ت یا ڤه‌گۆهاستنێ بۆ یانێ كریه پێخه‌مه‌ت ڤه‌گۆهاستنا یاریزانان لێ هه‌تا نوكه چو به‌رسڤ ل سه‌ر داخوازیا مه نه هاتیه دان سه‌رباری پێدڤیه‌كا مه‌زن ل سه‌ر هه‌یه ژبه‌ركو ده‌مێ یاریێن ده‌رڤه‌یی باژێرێ مه ئه‌م گه‌له‌ك پێدڤی نه و ئه‌م سۆپاسیا سه‌رپه‌رشتێ ئێدارا زاخۆ و قائیمه‌قامێ قه‌زا باتیفا دكه‌ین كو پشته‌ڤانێن مه‌نه و هه‌یڤانه كۆژمه‌كێ پاره‌یی بۆ یانێ خه‌رج دكه‌ن.
ل دووماهیێ ناڤهاتی ئه‌وچه‌نده ژی گۆت: تیما مه یا ته‌پا پێی به‌رهه‌ڤیه‌كا باش دكه‌ن تایبه‌ت پشتی مه چار یاریزان ژ باژێرێ زاخۆ دناڤ رێزێن تیما خوه دا زێده‌كرینه و نوكه ئه‌م مژیلی لێگه‌ریانا یاریزانه‌كێ هێرشبه‌رین ژبه‌ركو د وێ هێلێ دا مه كێماسی هه‌یه.
