نه‌خوشخانه‌كا مودێڕن ل شێلادزێ هاته ڤه‌كرن
ئه‌ڤرۆ، نه‌وزاد هلۆری:
ب مه‌ره‌ما خزمه‌تكرنا كه‌رتێ ساخله‌میێ، ئێك ژ نه‌خۆشخانێن مودێڕن ل ناوچه‌داریا شێلادزێ هاته ڤه‌كرن، پشكه‌ك ژ نۆشدارێن وێ ژی بڕیار دا ل ده‌ستپێكا ب كاربوونا خوه بێ به‌رامبه‌ر خزمه‌تا نه‌خۆشان بكه‌ن.
زیاب محه‌مه‌د، رێڤه‌به‌رێ نه‌خۆشخانا هیوا یا تایبه‌ت ل شێلادزێ بۆ ئه‌ڤرۆ گوت: (ب مه‌ره‌ما خزمه‌تكرنا كه‌رتێ ساخله‌میێ و ب پشته‌ڤانیا حكومه‌تا هه‌رێما كوردستانێ نه‌خۆشخانا هیوا ل شێلادزێ هاته ڤه‌كرن و كه‌فته د خزمه‌تا وه‌لاتی و خه‌لكێ ده‌ڤه‌رێ دا).
زێده‌تر گۆت: (پڕانیا نۆشدارێن تایبه‌تمه‌ند ل نه‌خۆشخانێ هاتینه دانان و پڕانیا خزمه‌تگوزاریێن ساخله‌میێ ژی وه‌كو راوێژكاری، دارمانخانه، تاقیگه‌هـ، سونار، تیشك و خزمه‌تگوزاریێن دی ب ئامیرێن هه‌ره پێشكه‌فتی هاتیه به‌رهه‌ڤكرن، ئێدی پێدڤی ناكه‌ت نه‌خۆش بچنه‌ی ده‌رڤه‌ی سه‌نته‌رێ شێلادزێ، ژ به‌ركو پڕانیا نه‌خوشان بۆ چاره‌سه‌ریێ قه‌ستا ده‌رڤه‌یێ شێلادزێ دكر، خه‌لكێ ده‌ڤه‌را شێلادزێ و دێره‌لوكێ ئامێدیێ و ده‌ڤه‌را بارزان ژی دێ مفای ژ خزمه‌تگوزاریێن وێ وه‌رگرن).
ناڤبری دیار كر ژی كو ل گه‌ل ڤه‌كرنا نه‌خۆشخانێ پشكه‌ك ژ نۆشدارێن وان بۆ چه‌نده‌كێ دێ بێ به‌رامبه‌ر خزمه‌تا وه‌لاتیان كه‌ن.
