د حه‌فت رۆژان دا 414 زارۆك ل پارێزگه‌ها دهۆكێ ژ دایك بووینه
دهۆك، له‌زگین جوقی:
به‌رپرسێ راگه‌هاندنێ ل رێڤه‌به‌ریا گشتی یا ساخله‌میا پارێزگه‌ها دهۆكێ دیار كر، ل بێنڤه‌دانا سه‌رێ سالا نوو شه‌ش كه‌سان ژ ئه‌گه‌رێ روودانان گیانێ خوه ژ ده‌ست دایه و بۆ نۆشداریا داد هاتینه ڤه‌گوهاستن و 10 هزار 284 كه‌سان سه‌ره‌دانا پشكێن ته‌نگاڤیان ل نه‌خۆشخانه‌یێن پارێزگه‌ها دهۆكێ كرینه و 414 زارۆك ژ دایك بووینه.
حه‌مزه ره‌زیكی، به‌رپرسێ راگه‌هاندنێ ل رێڤه‌به‌ریا گشتی یا ساخله‌میا پارێزگه‌ها دهۆكێ دیار كر، به‌ركه‌فتیێن روودانێن هاتنوچوونێ هه‌شت كه‌س بووینه و هزار و 549 نه‌خۆش د ناڤ نه‌خۆشخانه‌یان دا هاتینه نڤاندن بۆ وه‌رگرتنا چاره‌سه‌ریێ و 414 زارۆك ژ دایكبووینه، ژ وانا ژی 190 كوڕ و 224 كچ بووینه و 204 نشته‌رگه‌ری هاتینه ئه‌نجامدان و شه‌ش كه‌سان ژ ئه‌گه‌رێ روودانان گیانێ خوه ژ ده‌ست داینه و بۆ نۆشداریا داد هاتینه ڤه‌گوهاستن، ژ وانا ژی سێ سۆتن و ئێك روودانا ترۆمبێلێ و ئێكی خوه خه‌ندقاند و ئێك ژی مرنه‌كا ژ نشكه‌كێڤه و 24 كه‌سان ژ ئه‌گه‌رێ نه‌خۆشیان ب تایبه‌تی ژی جه‌لتێن دلی و مه ژی و نه‌خۆشیێن دۆمدرێژ گیانێ خوه ژ ده‌ست دایه.
ره‌زیكی گۆتژی: “هه‌شت روودانێن ب شه‌رچوونێ هاتینه تۆماركرن و شه‌ش حاله‌تێن كه‌تن ژ بلنداهیان ژی هاتینه تۆماركرن و 107 نه‌خۆشان قه‌ستا نه‌خۆشخانا سۆتنێ كریه و نشته‌رگه‌ریێن جوانكاریێ كرینه، هه‌روه‌سا ژی زێره‌ڤانیا ساخله‌میێ 45 سه‌ره‌دان ئه‌نجام داینه و 11 هۆشداری داینه جهێن سه‌رپێچكار و پێنج جه ژی هاتینه گرتن”.
گۆتژی: “198 كه‌سان په‌یوه‌ندی ب تیمێن 122ێ كریه، ژ وانا ژی 22 روودان یێن یاریێن ئاگری بووینه، یێن دی ژی روودانێن ترۆمبیلان و گێژبوون و جه‌لته و حاله‌تێن جودا جودا بووینه و 33 پشكنینێن كۆرۆنایێ هاتینه كرن و چو حاله‌تێن نوو نه‌هاتینه تۆماركرن”.
