خه‌لكێ ئه‌لمانیا ژ پاشه‌رۆژا خوه بێ هێڤی نه
ب، سه‌رجان مه‌حمود:
ل گۆر راپرسیه‌كێ كو ژ ئالیێ كۆمپانیه‌كا راپرسیان ل چه‌ندین باژێرێن ئه‌لمانیا هاتیه كرن دیار دبیت كو خه‌لكێ ئه‌لمانیا ژ پاشه‌رۆژا خوه بێ هێڤی نه، پشكداربوویێن راپرسیێ دیار كرینه كو ره‌وشا ئابووری یا وه‌لاتی نها باش نینه، هاتنا په‌نابه‌ران ژی بوویه ئه‌گه‌ر كو گه‌له‌ك ئاریشێن دی یێن جڤاكی ژی بۆ وان دروست ببن، هه‌روه‌سا سیسته‌مێ ساخله‌میێ یێ ئه‌لمانیا ژی گه‌له‌ك لاوازیێن خوه هه‌نه و ژ به‌ر هندێ ژی ئه‌و ژ پاشه‌رۆژا خوه بێ هێڤی نه.
چاڤدێرێن سیاسی دیار دكه‌ن كو شه‌رێ ئۆكرانیایێ كارتێكرنا خوه ل ره‌وشا ژیانا پڕانیا وه‌لاتێن ئۆرۆپا ب تایبه‌تی ژی یا ئه‌لمانیا كریه، كه‌لوپه‌لێن خوارنێ گه‌له‌ك گران بووینه ژ به‌ر هندێ ژی وه‌لاتی وه‌كو به‌رێ گه‌شبین نینن و وه‌سا دبینن كو هاتنا په‌نابه‌ران و شه‌رێ ئۆكرانیایێ دێ ره‌وشا ژیانا وان خرابتر ژی لێ كه‌ت.
