ئەنوەر مایی و چەند خالێن ڤەشارتی
مەحفوز مایی
دەمێ رادیۆیا كوردی ل بەغدا دەست ب وەشانا خوە یا ب زمانێ كوردی كری، ئەو بوو دەرگەهەك بۆ سترانبێژ و ڕۆشنبیرێن كورد كو ب ڕێیا وێ ڕادیۆیێ هونەر و ئافراندنێن خوە پێشكێشی گەلێ كورد بكەن.
ئەنوەر مایی ژی یەك ژوان ڕۆشنبیران بوو كو دلێ وی ب وێ ڕادیۆیێ شاد بوبوو، لەوما وی گەلەك جاران سەرەدانا وێ ڕادیۆیێ دكر.
شاعرێ ناڤدار حەسیب قەرەداغی، كو ڕۆژەكێ من ئەو ل ڕادیۆیێ دیت، وی وەسا هزر كربوو كو ئەنوەر مایی بابێ منە، وی گۆت؛ من و ئەنوەر مایی هەڤالینی هەبوو، من گەلەك جارا ئەو ل ڕادیۆیێ ددیت.
سالێن ١٩٥٧ ـ ١٩٥٩ ئەنوەر مایی سەرەدانا ڕادیۆیێ ل بەغدایێ دكەت. ئەو كەچا خوە ( پەروین) و كەچا پسمامێ من عبداللە صدیق ( فەوزیە) كو ٤-٥ سالی بوون، وان دگەل خوە دبەت ڕادیۆیێ.
هونەرمەندێ نابینا ( فەخری بامەرنی) ئەو ژی ل بەغدایێ بوو.
ئەنوەر مایی پەیڤێن سروودا ( وەلاتێ مە كوردستانە) دانە فەخری. كو فەخری هینگێ ئەو سروود و سترانا فولكلۆری ( دێ وەرن گولا بچینن) ل ڕادیۆیێ تومار كرن، ئەو هەردو كچێن زارۆك كو ئەنوەر مایی دگەل خوە بربوون رادیۆیێ، ئەو هەردو دبنە كورس دگەل فەخری وان دو سترانا دبێژن.
هەمی كەس وەسا دزانن كە سروودا ( وەلاتێ مە كوردستانە) یەكەم جار هونەرمەندا یەریڤانێ ( ئەلیسكا قادر) ئەو یا ل رادیۆیا یەریڤانێ گۆتی.
لێ من ب خوە چەند سال بەرێ ل هەولێرێ ژ وێ هونەرمەندێ پرسی كا كێ ئەو سروود بۆ تە ئامادە كربوو، وێ گۆت؛ مە ژ رادیۆیا كوردی یا بەغدا بهیست بوو لێ مە هندەك گوهارتن لێكرن و من تومار كر.
هەر وان ڕۆژێن كو ئەنوەر مایی ل ڕادیۆیێ بوو، وی هونەرمەند شەمال سائیب دیت و هەلبەستا ( زولەیخا) یا ئەحمەدێ نالبەند دابوو وی، وی هینگێ ئەو ستران ل رادیۆیا كوردی بەلاڤ كر.
خەج و سیابەندا عیسا بەرواری.
هەلبەستڤان موئەیەد تەیب كو وەختێ خوە بەرنامەیێ ( هەر سترانەكێ چیرۆكەك هەیە) ل ڕادیۆیا بەغدا پێشكێش دكر، وی گۆت؛
من ڤیا چیرۆكا ڤێ سترانێ بزانم. من پرسیار ژ عیسا بەرواری كر كا وی ئەڤ سترانە ژ كێ گوهلێبوویە و چیروكا وێ چاوایە. گۆت من گۆتە وی هندی مە بهیستی چیرۆكا ( ئەحمەدێ سلیڤی و خەجێ) هەیە لێ ب خەج و سیاند چاوسیە؟
عیسا بەرواری گۆت؛ من ئەڤ سترانە ژ كەسێ نە بهیستییە، من ئەنوەر مایی ل رادیۆیێ دیت، وی تێكستا ڤێ سترانێ بۆ من نڤێسی و من ژی وەك مقام ل رادیۆیێ تومار كر.
ژێدەر:
ـ دیدارا من دگەل ئەلیسكا قادر.
ـ روینشتنەك دگەل موئەیەد تەیب.
