خەیالا تۆز گرتی
سیپان مستەفا
شەڤا درێژ، خەیالا من یا تۆز گرتی جارەكادی ل دۆرتە دێ زڤریت، ئاشۆپا من دگەل تە ددانیت، هەر وەكو دێ بیتە راستیەكا رۆهن، هەر بەرەڤ دوماهیێ ڤە دچیت.
جارەكادی ل دەستپێكێ ڤە دگەرم، دوبارە رۆمانا خوە نوو دكمەڤە، مینا رۆماننڤیسا، چیرۆكنڤیسا ل هەمی چیرۆكێن خوە ل كێم و زێدەهیان دگەرم، هەروەكو من دڤێت بكمە راستی، ل وی دگەرم كو ئێكەم هەناسەیا ژدایكبوونا خوە بینمە هەبوونێ ڤە، دوبارە چاڤێن خوە ل ڤێ ژیانێ ڤەكەم دا وان رویدانێن بووینە ئەگەرێ دووربوونا من و تە ژناڤ قەدەرا خوە لابدەم، داپیچەكێ ل هەست وسوزێن بێ هەبوون دوور بكەڤم، خەیالا دووربوونێ ژیان یا ل من ئالۆز كری، نزانم ب چ هەست و ب چ هەبوون ل دەستپێكا چیرۆكا خوە ڤەگەرم.
من دڤێت هەر ل دەستپێكا هەبوونا خوە ب چەند خۆلەكا جارەكادی بۆ مرنێ ڤەگەرم دا ل جیهانا بەرزەخێ دا ل گەل چە ند چركێن كێم ژیانا خوە ب ئارامی بنڤم، نەكو ساخەكا مری بم، هەر وەكو مرۆڤەكا تاوانبار.
ل ژیانەكا مینا بەرزەخێ دا، ل هیڤیا دادگەها خوە ما بیت، داكو داوی ب ئازارا چاڤەرێبوونێ دا بهێت، بێدەنگیا تە و دووریا رێكا ل ناڤبەرا مە دا ئازارەكا دیە، دزانم ئەز بێ تەناهی سەرێ خوە ل ناڤ ڤێ خەمێ چیرۆكێ دگەرم، هەلگرا خەما مە، سوارەكا بار كریمە، ل ژێهەلییەكا بلند ب رێكەتیمە، هەڤسارێ من یێ بەردای یە، هندەك جاران ل دۆر سەرێ خوە دزڤرم، هندە ك جاران ل پاشڤە ڤەدگەرم.
ئەڤیندارەكا سەر بری مە، مەعشوقێ من های ژ من نینە، دانەرا چیرۆكەكا بێ دوماهی مە، ل ناڤدا ژ بلی من و لاوێ من كەس ئەكتەرێ ڤێ رۆمانێ یان چیرۆكێ یان داستانێ نینە، خەیالا من یا پری هەستە، دێ بێژی مەم و زینە گرتنا چاڤێن من خوەشیەكا دی یە، ئەها ل وی دەمی ل من رۆژ هەلاتە ل گەل هەلاتنا رۆژی، شەڤا من یا درێژ دەسپێ دكەت، خەوا گران چاڤێن من دگریت، ئاشۆپا من بەرزە دبیت، مۆما كچكا مۆمفرۆش ڤەدمریت. لاوێ من دگەل وێ مومێ بەرەڤ ئاسمانێ تاری ڤە ب رێك دكەڤێت، ئەز ب خەما گران ڤە ل قولاچەكا باژێرەكی پری خەون و خەیال دوماهیك هەناسە هەلدكێشم، ل رێیا تە، ل شوین پێن تە، ب دویڤ تە دكەڤم، دا ل بەهەشێ ل كێلەكا تە بم، تل و دەستێن من ل دۆر گەردەنا تە وەریای بن، ئاگرێ ئەڤینا تە یێ ڤەمریای بیت، یا كو ل سەر زەمینی پێ دهاتمە سۆتن، بلا خەیالا من ببیتە چیرۆكەكا پری رامان، ببیتە دەرمان ل نك نوژدارێن دەروونناس یان ببیتە هەلبەست ل بەر دەستێن هەلبەستڤانان.
