بریتانیا: دڤێت خوە بۆ شەڕەکێ دۆمدرێژ بەرهەڤ بکەین
ئەڤرۆ
سەرجان مەحمود:
وەزیرێ بەرگریێ یێ بریتانیا راگەهاند شەڕێ نها د ناڤبەرا رۆسیا و ئۆکرانیایێ دا ئێدی گەهشتیە قۆناغەکا نوو، شەڕ گەهشتیە بەر دەرگەهێ بریتانیا و دڤێت خوە بۆ شەڕەکێ دەمدرێژ و دژوار بەرهەڤ بکەن، چونکی رۆسیا نها ب هەموو هێزا خوە ئێرشی ئۆکرانیایێ دکەت و دیارە رۆسیا هەتا نەگەهیتە ئارمانجێن خوە دەست ژ شەڕی بەرنادەت، ئەو یەک ژی رامانا هندێ ددەت، کو شەڕ ل بەر دەرگەهێ بریتانیا و گەلەک وەلاتێن دی یێن ئۆرۆپی یە.
بین والاس ئەو یەک ژی دیار کر پۆتینی دڤێت پشتی ئۆکرانیایێ ئێرشی هندەک وەلاتێن دی یێن ئێکەتیا ئۆرۆپا ژی بکەت، هەکە تشتەک وەسا روو بدەت وی دەمی دێ ئۆرۆپا تووشی شەڕەکێ نوو بیت و گۆت: (ژ بەر هندێ ژی ئەز دبێژم، کو شەڕ گەهشتیە بەر دەرگەهێ بریتانیا، دڤێت خوە بۆ شەڕەکێ بەرفرە بەرهەڤ بکەین، هەر چەندە کاریگەریا شەڕێ نها ل سەر بریتانیا و گەلەک وەلاتێن دی یێن ئۆرۆپی هەیە، لێ بەردەوامیا شەڕی و پلانێن نها یێن پۆتینی نیشا ددەن، کو دڤێت خوە بۆ شەڕەکێ نوو و دەمدرێژ بەرهەڤ بکەین).
