دەمێ ناخێ ئەردی دهەژت
خالد عەلی
محەمەد موراد ئیلدان دبێژت:” ب تنێ دو هێزێن زەبلەح دشێن ئەردی ب هەژینن، بیڤەلەرزێن دژوار و هزرێن مەزن.”
پێشكێشە بۆ گیانێ هەمی قوربانیێن بێگوننەهیێن بیڤەلەرزان ل هەر دەم و جهەكی.
(1)
درندەیێ بن ئەردێ هشیار بوو
ئامادە ببن، دەڤێ وی یێ ڤەدبت
یێ نێزك دكوژت و یێ دوور ل دەرفەت بت
ژ پستوكا ترسا وی دگرت
و هێدی ل بن گوهێ وی پستپستەكێ دكت
و غەوارە دبت.
(2)
هەمی دیمەن ناخهەژینن
هەمی رۆندك تێرا نینن
زارۆك و ژن و پیرە كال
ژ نشكا ئێدی نابینن
نۆژدارۆ ما تو دێ چ كی؟!
لەش نەمان هەمی برینن.
(3)
بەرەك نەما ل سەر بەری
دێمەك نەما ل بەر دەری
باژێرەك ڤالا و مریتۆ
كەلەخ ل وارا وەك شەڕی
واتا ژیانێ ژێر “سفر”ە
ل سەر پیڤەرێ رێختەری.
(4)
یاریا زارۆكا هەنێ
سەر كاڤل كەتی ب تنێ
چاڤكێن كامیرا دبنێ
تۆزگرتی و ب دەستەكێ یە
و دەستێ دی یێ یاریێ
یێ د دەستێ خودانا خوە دا
ل بن دیوارێن خانی
كامیرە نا گەهنێ.
