خەونێن هشیاریێ
فەهیما ئیبراهیم
ریمشاید – ئالمانیا
ب پەیاسەیەكا درێژ، داڤێن دەمی دكرنە دپێن خوە ڤە و غەوارەی نەبوونێ دكرن، بەلگێن داران د وەشیانە درێكێ دا و درب ل هەستێن نازك و كەفتی ددان. خوە ل بەر كنارێن باخچەیەكی دیت. بەلگەك ڤەچەماندە ناڤ دەستێ خوە دا.
هەستپێ دكم هەردەم من رەڤینا خوە دكرە ئێكانە بهانە كو ژ ژیواری ب دووركەڤم، ل داویا رەڤینا خوە ژی هەردەم من خوە ل وی خالێ ددیت یا پێنگاڤا ئێكێ من لێ هاڤێتی.
لبەر لێڤا جاددەیێ ل سەر كورسیكەكێ روونشتە خوار و تژی ناڤ هەناسەیا خوە بێهنا غەریبیێ كر.
ئەڤ ئێڤارە گەلەك یا سەیرە، بایێ یاریا ب پەرچەمكێن من دكەت، جار بۆ ڤی لایی، جار بۆ لایێ دی باددەت. جوانیا دیمەنێ ل دەوروبەران، ئەڤ باخچەیێ پر ژ گول و نێرگزان نەشێن خەمۆكیا ل سەر دێمێ من بەرزەكەن، هەر كەسێ دبۆرت ب چاڤەكێ سەیر ل من دنێرت، هەستپێ دكم مینا پەیكەرەكی ل ڤێرێ یا دانایمە، بێ رح، بێ لڤین، بێ هەست
هندەك زاڕۆكان ل وێڤەترێ یاری دكرن و دكەنین، كەنیا وان ئەو گرنژاند و دێمێ وێ یێ تژی خەم هەموو كرە بشكۆرین.
ب كەلیجانەكا مەزن بەرەڤ ئارمانجەكێ ب ڕێ كەتم، لێ هەر ژ پێنگاڤا ئێكێ من هەست ب وەستیانا رێ كر، من هزردكر هیڤییێن من ب هەبوونا تە گەكەك د نۆرمال بوون، هەردەم من حەزژ وان ڕیێا دكر یێن ڤەكری، ڕیێن بێ راوەستیان بەرەڤ ئارمانجان، ڕێین بێ ئاستەنگ.
لێ چ ڕێ بۆ گەهشتنا تە نەبوون. وەسا هاتمە ژبیركرن، هەروەكو چ جاران نەبوویم، مینا خەونەكێ، شەبەنگەكێ دناڤ داڤێن بیرهاتنان دا هاتمە بەرزەكرن، من خوە دناڤ خەونێن هشیاریێ دا ژ دەستدا.
ئەو بەلگێ قورمچاندی ل گەل بایی بلند بوو و هەتا ل بەر چاڤان بەرزەبوویی.
پێدڤی ب دلەكی مەزنتربووم، ب مەزنیا گەردوونی، دا تێرا ڤان هەموو دەرد و ئازاران بكەت. ما دێ چاوا هەست ب فڕینێ كەم هەكە چەنگ دشكەستی بن؟.
رابووڤە و پێنگاڤەك بەر ب سەمتا ئاڤابوونێ هاڤێت.
من چەند بزاڤكرن پێكهاتنەكێ دگەل دەروونێ خوە پێكبینم، ب پەیڤێن جوان، ب گرنژینەكا چێكری، من خەونێن خوە هەمبێزكرن، دناخێ خوە یێ هاڤی دا ل كەسەكا دی دگەریام، لێ ئەو لێگەریانە گەلەك یا ترسناك بوو، پتر بەرزە دبووم، حێبەتی مام، گرفتار بووم دناڤبەرا هەستكرنێ و بێهەستیێ دا، من دڤیا خوە ئاشكراكم، خوە دیاركم، نە بۆ كەسێ، بەلكو بۆ خوە ب خوە.
رۆناهیێن كز وەكر پێنگاڤێن ب لەزتر بهاڤێژت.
گەلەگ ژ تنێبوونێ دترسیام، گەلەگ دترسیام رووبرووبوونێ دگەل دەروونێ خوە بكم.
نەچار بووم رووبرووبوونا وان هەموو ترس وئازار وهەستێن نەرێنی یێن دەروونێ من داگیركرین بكم.
ل وی دەمێ تە دەستێ من بەردای، ئازار تێكەلی ناخێ من بوون، چیڕۆكا ژانێن من دەست پێكر، هەژار بووم، سێوی بووم، بێخودان بووم، تا بۆ من دیار بووی ئەوا ئەم پێكڤە گرێداین نە حەزژێكرن بوو، بەلكو هندەك هەستێن خاپینۆك بوون، بەلكو رەڤینەك بوو ژ ژیواری، ژ وێ هەموو ڤالاتیا دەروونێ من ڤەدگرت، ل داویێ ژی چەنگبڕی ل سەمتا خوە ڤەگەڕیام.
سەرێ خوە بلند كر و ل سەمتا رۆژێ كو دئاڤابوونێ دا خوە سۆركربوو، چاڤین خوە ڤەكرن.
هەردەم د بیردانكا خوە دا ل پیرۆزیا دگەریام، من لاڤا ژ خوەداوەندا دكرن، هەڤركیا من دگەل دەروونێ من گەهشتبوو راددا بێهیڤیبوونێ.
هەست پێ دكم، ب پەیڤەكێ تو دشیای هەموو تشتان بگوهۆری، رامانەكا دی ب دەیە هەمووتشتان، بەلكو تە ب وێ پەیڤێ ئەز ڤەگەراندبام، تە ئاگەهـ ژ چ تشتا نینە، تە ئاگەهـ ژ بەرزەبوونا من نینە، تا دناڤ ڤێ بەرزەبوونێ دا ژی ژ بلی تە، چ رۆناهیێن دی بۆ رۆهنكرنا ڕێیا خوە نابینم، د سەر ڤێ هەموو پشتگوههاڤێتنێ را، مینا شەبەنگەكێ ل پەی تە ددەمە ڕێ.
ل كنار باخچەیی زڤڕی و دەستێ خوە دانا سەر گولەكا سپی.
هەست ب ڤالاتیێ دكم، هزردكم یا ژ هەموو هەستان ڤالا بوویم، گوهۆرینەك، كارڤەدانەك، دا دەرگەهێن باوەریێ ل هەمبەر من ڤەكەن.
هەست پێ دكم جارەكێ ب تنێ دەنگەك، بەرێخودانەك، لڤینەك ژ تە بەرەڤ من ڤە بهێت، دا هەر تشتی دوبارە د من دا ڤەژینت.
هەرچەندە من باوەری ب موعجیزا نینە، لێ هیڤیەك دشێت تاریا شەڤێ ب ستێران رۆهن كەت.
هەر جارەكێ ب رژدی دناخێ خوە دا هەست ب ئومێدەكێ دكم، دەنگەك ژ دوور دهێت، من ژ بێهۆشیێ هشیاردكەت، هەست پێ دكم یا ژ جیهانێ ڤەقەتیایم، د ڤێ یاخیبوونێ دا ئەزا ل خوە یا بەرزە دگەرم، دەمێ دكەڤییە هەمبەر بارۆڤەیێن بیرهاتنان و تژی دبی ژ خەریبیێ، هەست پێ دكەی جیهان تە ل دۆر خوە دزڤرینت، ل وی دەمی سیتافكەك، پێژنەك، گازیەك دێ تە ڤەگەرینتە كەتواری.
من دڤێت بێژمە تە، نزانم ژ كەنگی وەرە ل سەر ڤێ كورسیكێ روونشتیمە و نزانم كا چەند فڕ ل ڤێ چایا تەحل دانە. دیسا رۆژا من یا ئاڤا دبیت و ب هەمان سەلیقە دێ ل هیڤیا هەلاتنا رۆژەكا دی بم.
ئاسۆیێ رۆژ دهلچنی و بەرێڤەی سنوورێن خوە دكرن و گەوراتی تژی كۆلانان دكر و پێنگاڤێن وێ ئەو ب بەر ب ئاسۆیێن خولیكی دكێشا.
