خەلکێ باژێرەکێ رۆژهەلاتێ کوردستانێ داخوازا هاریکاریێ دکەن
ئەڤرۆ
دوهی بێڤەلەرزا دی ل باژێرێ خوێ یێ رۆژهەلاتێ کوردستانێ دا و د ئەنجام دا نێزیکی دوسەد کەس بریندار بووینە و چەند وەلاتیان ژی جانێ خۆ ژ دەست داینە، وەلاتیێن وی باژێری داخواز ژ بەرپرسێن ئیرانێ دکەن، کو هاریکاریا وان بکەن. چونکی د ناڤ مەهەکێ دا چەندین جاران ژ بەر بیڤەلەرزێ زیان گەهشتیە باژێرێ وان و هەتا نها ژی وەکو پێدڤی هاریکاریا خەلکی نەهاتیە کرن.
ل ئالیێ دی بەرپرسەکێ وی باژێری کو نەخواستیە ناڤێ وی بهێتە ئاشکرا کرن، دیار کریە رەوشا ئابووری یا ئیرانێ گەلەک خرابە و هەتا نها چو بۆدجە بۆ هاریکاریا خەلکێ لێقەومی یێ باژێرێ خوێ نەهاتیە تەرخان کرن، وان چەندین جاران داخوازا هاریکاریێ کرینە لێ هەتا نها چو تشتەک نەهاتیە کرن.
وەلاتیێن باژێرێ خوێ ژی دیار دکەن، بەرپرسێن ئیرانێ رێ نەداینە کو تورکیا هاریکاریا وان بکەت و ئەو بخۆ ژی هاریکاریا وان ناکەن و ژ بەر هندێ ژی ئەو د رەوشەکا گەلەک خراب دانە.
