رێگریكرن ل دوگیانیێ یا گرنگە بۆ ساخلەمیا دایكێ و زارۆی
ئەڤرۆ
بەرپەرێ ساخلەمیێ:
د.چنار مستەفا ئامێدی، تایبەتمەندا نەخۆشیێن ژنان و زارۆكبوونێ دیاركر، هەلبەت ژن نەه هەیڤا چاڤەرێی پەیدابوونا زارۆكی دبیت، ئەڤجا چ ب رێكا سرۆشتی، كو باشترە، یانژی ب رێیا نشتەرگەریێ، ل دەمێن پێدڤی، پشتی چلكێن وێ ب دووماهی دهێن، سەرەدانا نۆشداری دكەن داكو گەنگەشێ بكەن ل دۆر “مانعی” و گۆت: بابەتێ رێگریێ ل زارۆكبوونێ گەلەك یێ گرنگە بو وێ چەندێ ژن پلانا خوە بدانیت ب كێماتی دو سالان وێ چ زارۆكێن دی نەبن.
د.چنار مستەفا دیاركر گرنگیا بابەتی د وێ چەندێ دایە كو هەكە بەری هینگی دو یان سێ نشتەرگەری كربن و ئەڤێ جارێ ژی ب رێیا نشتەرگەریێ پەیدابوو، نابیت ئەو “لولب”ی دانیت، دێ بۆ شرۆڤەكەین كو هەكە شیرێ خوە بدەتە زارۆكی دێ حەبێن رێگریێ دەینێ، داكو شیرێ وان كێم نەبیت، یانژی دێ لەزقا ملی بۆ هێتە دانان، یانژی دەرزیا هەر سێ هەیڤا جارەكێ دێ بۆ هێتە دانان، یانژی دشێت كۆندومی ب كاربینیت و گۆت: هەر جورەكێ “ مانعی” ل دووڤ مالبچووكێ ژنێ و عەمرێ وێ و جورێ ژدایكبوونێ“ سرۆشتی یان نشتەرگەری”یە و هەموو باشی و خرابیێن جورێ “ مانعی” دڤێت بۆ ژنێ بهێنە دیاركرن.
بو نموونە هەكە ژن حەبا ب كاربینیت دێ بو هێتە دیاركرن كا كەنگی پێدڤیە دەست ب وەرگرتنێ بكەت و چاوا بخۆت و گۆت: بو نموونە پێدڤیە هەر 24 سعەتا حەبەك بهێتە خوارن و هەكە ڕۆژەكێ ژبیركر، پێدڤیە رۆژا د دووڤدا دو حەبا بخۆت، یان دێ بو دیاركەین هەكە دو ڕۆژا سەرئێك نەخار دێ دوگیان بیت، یان دێ خوینبەربوون بۆ پەیدابیت.
د.چنار مستەفا، ئەوژی دیاركر كو هەكە “لولب”هاتە دانان، دێ بۆ دیاركەین كو دو جور یێ هورمونی و سرۆشتی هەنە، و گۆتژی: هەكە مالبچووكێ ژنێ یێ وەرمتی بیت و هەر خوینبەربوونا ڤەبر بو پەیداببیت، ئانكو “ تێكچوونا هومونی” هەبیت، ئەم ئامۆژگاریا لێدكەین كو ژ جورێ “ هورمونی” بدانیت، چونكو ژبلی رێگریێ ب كارێ چارەسەریێ ڕادبیت، شەش هەیڤێن دەستپێكێ عادەیا وێ یێ تێكچیت و دبیت درێژبیت یان نەبینیت، یان كێمخوینی ببینیت.
دەربارەی لەزقا ملی، پێدڤیە دیسا بۆ ژنێ باشیێن وێ و دەمێ “ ئێكسپایربوونا” وێ دیاربكەین و رەنگە دانانا وێ ببیتە ئەگەر كو نەبینیت یان زوو پاقژنەبیت، رەنگە ژی ب رێیا زەلامی بیت كۆندوم بهێتە ب كارئینان و چاوانیا ب كارئینانێ.
ل دووماهیێ دیاركر كو رێگریكرن ل زارۆكبوونێ هندەك دەلیڤا گەلەك یا گرنگە بۆ ساخلەمیا دایكێ و دا بشێت چاڤدێریا زارۆكێ خوە بكەت.
