كونفرانسێ ئێكێ یێ زانستی یێ نۆشداران دێ هێتە گێران
بەرپەرێ ساخلەمیێ:
د.ئاراز عبدال، سەرۆكێ سەندیكا نۆشدارێن كوردستانێ لقا دهوك دیاركر بو دەمێ چەند مەهایە ئەم وەك سەندیكا نۆشدارێن كوردستانێ لقا دهوك، دگەل هەردو كۆلیژێن پزیشكی یا دهوك و زاخۆ، هەروەسا دگەل رێڤەبەریا گشتی یا ساخلەمیا دهۆك، ئامادەكاریێن ئێكەم كۆنفرانسێ خوە یێ زانستی و پێشەیی دكەین، و گۆت: بریار هاتیەدان ئەف كۆنفرانسە ل رێكەفتی 11-12 ڤێ مەهێ ل رۆژێن پێنجشەمب و ئەینی بهێتە ئەنجامدان، ئەف كۆنفرانسە ژ دو پشكان پێكدهێت، پشكا پیشەیی و زانستی، بو پشكا پیشەیی دو پەنەل هاتینە ئامادەكرن، پەنەلەك دەربارەی كەرتێ ساخلەمیێ یە و چاوانیا پێشئێخستنا ڤی كەرتی، و پەنەلێ دوێ سەبارەت فێركرنا پزیشكی یە ل هەرێما كوردستانێ، وگۆتژی: دەهـ بابەتێن گرنگ هاتینە ئامادەكرن و دێ ژلایێ نۆشدار و كەسانێن شەهرەزا هێنە پێشكێشكرن ژ ناڤخو دەرڤەیی هەرێما كوردستانێ نە.
د.ئاراز عبدال دیاركر ژی سەبارەت پشكا زانستی پێكدهێت ژ 18 ڤەكۆلینان و بو جارا ئێكێ یە دهێنە پێشكێشكرن، و پتریا وان ژلایێ نۆشدارێن پارێزگەها دهۆكێ هاتینە ئامادەكرن، و گۆت: مە بلوكەكێ تایبەت دەربارەی نشتەرگەری و نەخۆشیێن گۆلچیسكان و جوبارێن میزێ هەیە، و هژمارەكا نۆشدارا ل سەرانسەری هەرێما كوردستانێ و عێراقێ دێ ئامادەی ئەڤی بلوكی بن، و دگەل ڤێ چەندێ دێ مە بلوكەكێ تایبەت ب نەخۆشیێن شەكرێ و قەلەویێ و نەخۆشیێن رژێنان هەبیت، و گۆتژی: دێ دو ماموستا ژ وەلاتێ بریتانیا دگەل مەدا د ئامادەبن، ژ زانكۆیا رۆیال كۆلیژ و ب خۆشحالی ڤە ژمارەكا باش یا نۆشدارا ل دهۆك و سەرانسەری هەرێما كوردستانێ و عێراقێ ژی خوە توماركرینە، و هیڤیا مە ئەوە بشێن بەشدار ببن، و ئەف كۆنفرانسە ببیتە جهێ مفای بو هەموو پشكداران.
