هەموو بەرهەڤی بۆ بەرهنگاریا تایا خوینبەربوونێ هاتینە كرن
هەولێر، قائید میرۆ:
بەرپرسەكا وەزارەتا ساخلەمیێ ئاشكرا كر، هەتا نوكە ب تنێ حالەتەكێ مرنێ ب تایا خوینبەربوونێ هاتیە تۆماركرن و دبێژیت: هەموو بەرهەڤی بۆ بەرهنگاریا تایا خوینبەربوونێ هاتینە كرن.
دكتۆرە بێریڤان یاسین، رێڤەبەرا خوەپاراستنا ساخلەمیێ ل هەولێرێ بۆ رۆژناما ئەڤرۆ دیار كر، ڤایرۆسێ تایا خوینبەربوونێ ل ئیراقێ بەلاڤبوویە و گەهشتیە هەرێما كوردستانێ ژی و گۆت: «حەفتیا بۆری حالەتەكێ تایا خوینبەربوونێ ل هەولێرێ هاتیە تۆماركرن و گیانێ خوە ژ دەست دایە، كو ژنەكا خەلكا ئیدارەیا سەربخوە یا سۆران بوو، هەر چەندە چارەسەری بۆ هاتە كرن، بەلێ درەنگ گەهشتە نەخۆشخانێ و گیانێ خوە ژ دەست دا».
دكتۆرە بێریڤانێ خویا ژی كر، ڤایرۆسێ تایا خوینبەربوونێ ل گیانەوەران دهێتە ڤەگوهاستن بۆ مرۆڤی، نەخۆشیەكا ڤەگوهێزەرە و دشێت ژ مرۆڤەكی بۆ ئێكێ دی بهێتە ڤەگوهاستن و گۆت: «وەزارەتا ساخلەمیێ هەموو بەرهەڤی بۆ بەرهنگاریا تایا خوینبەربوونێ كرینە و ل هەموو نەخۆشخانان پشكێن تایبەت هاتینە دیاركرن و دەرمان و چارەسەریێن پێدڤی ژی بۆ چارەسەریێ هەنە، بەلێ پێدڤیە هەر كەسەكێ نیشانێن دەستپێكی هەبن سەرەدانا نەخۆشخانێ بكەت و رێنمایێن ساخلەمیێ بجه بینیت، رێنمایی ژ لایێ وەزارەتا چاندنێ ژی ڤە هاتینە دەركرن».
