نەخۆشێن دەروونی پێدڤی ب گرنگی دانێ نە
ئەڤرۆ
سەباح زوهێر:
شارەزایەكێ دەروونی دیار كر، دەمێ كەسەك تووشی نەخوشیەكا دەروونی دبیت ژ گەلاك لایەنان ڤە تێك دچیت و كارتێكرنەكا مەزن ل سەر لایەنێن وی یێن ژیانێ دبیت و گۆت: لەوما دەمێ كەسەك تووشی نەخوشیەكا دەروونی دبیت پێدڤیە ئەم هاریكاریا وی بكەین و نە هێلینە بتنێ.
رەشاد زێباری، شارەزایێ دەروونی دیار كر، هەر كەسەك دەمێ تووشی نەخوشیەكا دەروونی دبیت سێ لایەنێن وی تێك دچن ئەو ژی لایەنێ دەروونی كو هزرا وی دهێتە گوهورین و هزرێن نە دروست دكەت و هەتا هندەك هزرا خوە كوشتنێ دكەن و نە ئارامیەك ل دەف پەیدا دبیت و گۆت: (هزرێن نەرێنی و رابردووی دكەت هزر دكەت كەس حەز ژێ ناكەت و گرنگیێ نادەتێ و كەس ل گەل دا نینە و یێ بتنێ یە و ژیان پێش چاڤێن وی نەخوش و رەش دبیت).
زێباری گۆتژی: (هەروەسا لایەنێ رەفتاری كو گوهۆڕین سەر كەسایەتیا مروڤی دا دهێت تێكەلینیا هەڤالان وەكی خوە نامینیت و ئەو كارێن بەری نوكە دكرن گرنگیێ پێ نادەت و ژ گەلەك تشتان دوور دكەڤیت هەتا ژ جڤاكی ژی، هەروەسا لایەنێ فسیولوجی كو خەو و خوارنا مروڤی تێك دچیت و كێشا لەشێ دهێتە خوار و گوهۆڕین د لەشێ مروڤی دا دروست دبن).
رەشاد زێباری ئەو چەندە ژی دیار كر، هەر دەما مە كەسەكێ هوسا دیت پێدڤیە زور گرنگیێ پێ بدەین و پشت گوه نەئێخن و نەهێلینە بتنێ و بارێ وی سڤك بكەین و گۆت: (هەروەسا باشترە كەسێ تووش بویی ژی هاریكاریا خوە بكەت، بەردەوام تێكەلیێ ل گەل جڤاكی بكەت و خو ڤەدەر نەكەت و هەكە پێدڤی بو خو نیشا نوشدارەكێ دەروونی بدەت).
