كارتێكرنا سونەتكرنێ د حەفتیا ئێكێ دا ل سەر زاڕۆی
بەرپەرێ ساخلەمیێ:
د. سەردار غازی پێداوی، تایبەتمەندێ نەخۆشێن زارۆیان ل نەخۆشخانا هیڤی یا زارۆیان دهۆكێ ئاشكەرا كر كو:» سۆنەتكرنا د حەفتیا ئێكێ دا ژ دایكبوونا زارۆی تشتەكێ زۆر شاشە دهێتە كرن و ئەم حەز دكەین خەلكێ مە زارۆیێن خوە حەفتیا ئێكێ دا سۆنەت نەكەن، هندەك كەس هەنە هزر دكەن هەكە د حەفتیا ئێكێ دا زارۆی سۆنەت بكەن زارۆك نا ئێشیت و سۆنەتكرنا وی زوو دێ ساخ بیت و زەركا زارۆی ژی دێ بەت، و گۆت: چو پەیوەندیا سۆنەتكرنا زوو یا زارۆی ب زەركێ ڤە نینە، ئەو زەركا ب سۆنەتكرنێ بچیت ئەو ب خوە دێ چیت و نە گرێدای سۆنەتكرنێ یە و چو ئاریشە دناڤ خوینا زارۆی دا نینن، لەورا ئەو زەرك زوو چارەسەردبیت و هەكە ئاریشەك د خوینا زارۆی دا هەبیت ئەو زارۆ بهێتە سۆنەتكرن و نەهێتە سۆنەتكرن ئەو زەرك دێ هەر مینیت، ژبەر ڤێ چەندێ ئەم دبێژین سۆنەتكرن دحەفتیا ئێكێ دا ژ دایكبوونا زارۆی چو پەیوەندی ب زەركێ ڤە نینە.
گۆتژی:» سۆنەتكرن گەلەك یا خەلەتە دهەیڤێن ئێكێ دا ژ دایكبوونا زارۆی بهێتەكرن، چونكو ئەڤە گەلەك حالەت مە دیتن ب تایبەتی ژی من دیتینە زارۆ ژیێ وی چار سال و پێنج سال بووینە هەردەم گازندە ژ زكێ خوە كرینە دبێژن زكێ من دئێشیت پشتی ئەم پشكنینا وی زارۆی دكەین دێ بینین كونكا وی یا بەرتەنگە و گەلەك یا بچووكە و دەمێ ئەو زارۆك دچیتە دەستئاڤا زراڤ وی دەمی راست و راست ناچیت، بەلكو یا دەرڤە یا بهێزە بۆ سەری دچیت، ژبەركو سەركێ ئەندامێ وی یێ نێرینە یێ تەنگە و ئەم دێ پسیار كەین دێ دایك بێژن مە حەفتیا ئێكێ دا یێ سۆنەتكری .
د. سەردار ئەوژی دیاركر كو بەهرا پتر یا وان زارۆیان ژی ئەون یێن حەفازە گەلەك بەردا دمینن ئەوژی كارتێكرنێ دكەت، چونكو دەمێ زارۆ دهێنە سۆنەتكرن و حەفازە بۆ دەمەكێ درێژ ل بەر زارۆی دا بمینیت فشار ل سەر سەرێ ئەندامێ وی یێ نێرینە دروست دبیت وەكو هەودانێ بیت وتەنگ د بیت ، لەورا ئەم بەردەوام دبێژینە نەساخێن خوە پێدڤیە حەفازە گەلەك بەر زارۆی نەمینیت هەر چەند دەمژمێران بێ حەفازە بمینیت باشترە داكو فشار ل سەر لەشێ وی كێم ببیت و باشترە زارۆ زوو بهێتە فێركرن بۆ دەستئاڤێ، هندەك زارۆ هەنە ژیێ وان سێ سال وچار سالن هیشتا دایكێن وان فێری دەستئاڤێ نەكرینە ئەڤە تشتەكێ باش نینە.
ناڤهاتی تەكەز كركو پشتی سێ هەیڤیێ باشترە زارۆك بهێتە سۆنەتكرن داكو تووشی ئاریشەیێن ساخلەمیێ نەبیت دەمێ مەزن دبیت هەتا جل وبەرگێن تەنگ ژی بۆ زارۆی دباش نینن.
