سەوەفان ل چۆكێ یان حەوزێ و مۆڤکان بیت پێدڤیە نەخۆش هاتنوچوونێ بكەت
د. بەهزاد بەهجەت بامەرنی، تایبەتمەندێ نەخۆشیێن هەستی و شكەستنان دیاركر سەوەفانا گەهان نەخۆشیەكا بەربەلاڤە دناڤ جڤاكێ مەدا ب تایبەتی سەوەفانا چۆكێ، سەوەفانا چۆكێ د ژیێ پێنجی ساڵیێ و سەردا و ل دەف ژنان پتر ژ زەلامان پەیدا دبیت، ژ نیشانێن ڤێ نەخوشیێ ئێشانا چۆكێ د دەتە رانی یان بنێ پێی یانژی وەرمینا چوكی، هەروەسا قفلبوونا چوكی دەمێ روونشتن و رابوونێ، ئەڤە ئەو نیشانن كو نەخۆش سەرەدانا نۆشداری دكەت.
تایبەتمەندێ هەستی و شكەستنان دا زانین ئەگەرێن دروستبوونا سەوەفانا چۆكان تێكچوونا كركرێن چۆكینە كو گرانی دكەڤیتە سەر و هەستی نێزیكی ئێك دبن و دبیتە ئەگەرێ ئێشانێ، و گۆت: سەوەفان ل دەف ژنێ زێدەترە، چونكو هورمونێن ژنێ د عەمرێ چل هەتا پێنجی سالیێ كێمدبن و هێزا كركر و هەستی كێمدبیت و سەوەفان پەیدادبیتن، هەروەسا تەعدای دهێتە كرن سەر چوكی و حەوزێ ژنێ دەمێ دووگیانیێ دا و كێشا زێدە یا ژنێ كاریگەریێ دروست دكەت، هەروەسا كێمیا هاتنووچوونا ژنێ د جڤاكێ مەدا كو دەركەتنا وێ یا سنوردارە .
هەروەسا ئەوژی دیاركر چارەسەریا سەوەفانێ پێدڤیە نەخۆش كێشا لەشێ خوە كێم بكەت ئەگەر یا زێدەبیت، هەروەسا زەحمەتێ بو چوكان دروست نەكەتن وەكی نە چەمینیت ل بن خوە ڤە و بۆ دەستاڤێ پێدڤیە یا غەربی ب كاربینیت و دەرەج و ئەڤرازیان كێمكەت، هەروەسا خوە ب پارێزیت ژ سەرمایێ و گەلەك هاتنوچوونێ ئەنجامبدەت و غاردان و خوە هەلاڤێتن چێنابن بۆ ڤێ نەخۆشیێ، هەروەسا دگەل ڤان دێ دەرمان هێنە ب كارئینان كو چەندین جورن و ئەڤ دەرمان و چارەسەریە دهێنە بكار ئینان بو راوەستاندنا سەوەفانێ “چ چارەسەریێن دووماهی ئینان ب ڤێ نەخوشیێ نینن” ئەگەر سەوەفان گەهشتبیتە قۆناغێن پێشكەفتی وی دەمی پێدڤی ب نشتەرگەریێ یە ئەوژی نشتەرگەریا گوهورینا گەها چوكێ یە، سەوەفان ل چۆكێ پترە ژ حەوزێ.
ل دووماهیێ د. بەهزاد بەهجەت بامەرنی، دیاركر سەوەفان ل چوكێ بیت یان حەوزێ بیت یان فەقەراتا بیت پێدڤیە نەخۆش هاتنوچوونێ بكەت بەردەوام، هەروەسا وەرزشێ ئەنجامبدەت دەمێ هاتنوچوون كێم بیت دێ هەستی خاڤ بیت و ماسولكە لاواز بیت، هەروەسا كركرك دێ لاوازبیت و پێدڤیە شێوازێ ژیانا خوە بگوهۆریت و ل دووف رێنمایێن نۆشداری بچیت.
