مەترسیدارترین حەبكێن بێهۆشكەر ل دهۆكێ هاتینە گرتن
هەولێر، قائید میرۆ:
رێڤەبەریا گشتی یا ئاسایشا هەرێما كوردستانێ ئاشكرا كر، د چەند رۆژێن بۆری دا باندەكێ بازرگانیێ ب ماددێن بێهوشكەر هاتینە دەستەسەركرن و دخواست مەترسیدارترین حەبكێن بێهوشكەر بفرۆشن و پەیڤدارێ ئاسایشێ ژی گۆت: مەترسیدارترین حەبكێن بێهوشكەر ل دهۆكێ هاتینە گرتن و ئەو باندێ بازرگانی ب ماددێن بێهوشكەر دكر ئەندامن د باندێن جیهانی دا.
نەقیب ئەركان، پەیڤدارێ رێڤەبەریا بەرهنگاربوونا ماددێن بێهوشكەر ل ئاسایشا هەرێما كوردستانێ د كۆنفڕانسەكێ رۆژنامەڤانی دا دیار كر، ل چەند رۆژێن بۆری هێزێن ئاسایشێ شیاینە 9 بازرگانێن ماددێن بێهوشكەر دەستەسەر بكەن و ل گەل دەستەر كرنا وان بازرگانێن ماددێن بێهوشكەر دەست ل سەر 452 كیلۆیێن حەبێن بێهوشكەر و 50 كیلۆیێن ماددێن بێهوشكەر هاتیە گرتن و كۆت: (پشتی وەرگرتنا فەرمانا دادوەرێ ئاسایشێ و هێزێن ئاسایشێ ب هەڤكاری ل گەل هێزێن دژە تیرۆرا كوردستانێ ئەم شیاینە رۆژا 1ی تەباخێ سێ مەزنە بازرگانێن ماددێن بێهوشكەر دەستەسەر بكەین).
نەقیبی ئەو چەندە ژی دیار كر كو پشتی ڤەكۆلینێ دەركەفتیە ئەو سێ بازرگانێن ماددێن بێهوشكەر ئەندامێن باندەكێ نێڤدەولەتیێ ماددێن بێهوشكەرن و زانیاریێن دروست ل دور هەبوونا هژمارەكا كۆگەهان هەیە دناڤا هەرێما كوردستانێ و عێراقێ پشتی هەماهەنگی دناڤبەرا وەزارەتێن ناڤخۆیا عێراقێ و هەرێما كوردستانێ هاتیە كرن و ژلایێ رێڤەبەریا گشتیا ئاسایشا هەرێما كوردستانێ ژۆرا ئۆپەڕاسیۆنێن هەڤبەش دناڤبەرا هێزێن ئاسایشا هەرێما كوردستانێ و دژە تیرۆرا كوردستانێ و رێڤەبەریا گشتیا بەرهنگاربوونا ماددێن بێهوشكەر یا عێراقێ هاتە پێكئینان و گۆت: (ئەم شیاینە ل پارێزگەها دهۆكێ سێ بازرگانێن ماددێن بێهوشكەر دەستەسەر بكەین و 236 كیلۆیێن حەبێن بێهوشكەر و 35 كیلۆیێن ماددێن بێهوشكەر ژ جورێ ئەفیون).
نەقیب ئەركان دا زانین ژی كو ل دەڤەرا رەبیە یا گرێدایی پارێزگەها رومادی هێزێن ئەمنی شیاینە شەش بازرگانێن ماددێن بێهوشكەر دەستەسەر بكەن ددەمێ دەستەسەركرنێ ژی 216 كلیۆیێن حەبێن بێهوشكەر و 15 كیلۆیێن ماددێن بێهوشكەر ژ جورێ ئەفیون هاتینە گرتن، ئەو جورێ حەبكا یێن هاتینە گرتن ئێكە ژ وان حەبێن زۆر مەترسیدار یێن بێهوشكەر، كو كارتێكرنێن راستەوخۆ ل سەر جڤاكی هەنە و كاریگەری هەیە ل سەر تێكدانا خێزانێ و گۆت: (ل سالا بۆری هەیڤا تەباخێ هەتا ئەڤ سالە هەیڤا تەباخێ ئەم شیاینە یەك هزار و 650 كیلۆیێن حەبێن جورێ كەبتاگون بگرین كو هەر كیلۆیەكا حەبێن كەبتاگون 350 هەتا 400 دنكێن حەبا هەنە و زێدەتری هەشت ملیۆن دنكێن حەبكان بووینە).
پەیڤدارێ رێڤەبەریا بەرهنگاربوونا ماددێن بێهوشكەر نەقیب ئەركان، د بەردەوامیا ئاخفتنێن خودا دیار كر د چالاكیا رۆژێن بۆری ژی دا هێزێن ئاسایشێ شیاینە دەست ب سەر 235 كیلۆیێن حەبكێن كەبتاگوندا بگرن و یەك ملیۆن و 400 هزار دنكێن حەبكا هاتینە گرتن، ئەڤەژی مەترسیدارترین جورێ ماددێ بێهوشكەرە و گۆت: (باندەكێ رێكخستی یێ ماددێن بێهوشكەر بزاڤ كرینە ئەڤی ماددێ بێهوشكەر ل هەرێما كوردستانێ بفرۆشن و هندەكێ ژی ل وەلاتێن دی بفرۆشن، بەلێ پشتی زانیاریێن هویر گەهشتینە هێزێن ئاسایشێ ئەم شیاینە ئەڤی باندێ مەترسیدار دەستەسەر بكەین ب مەرەما پاراستنا وەلاتیان ژ ماددێن بێهوشكەر).
