جۆرەكێ نوو یێ كۆرۆنایێ ل 51 وەلاتان بەلاڤبوویە
سەبارەت ژ دەستدانا كەسێن خۆشتڤی و نێزیك چارەسەركارا دەروونی، هەتاو ئەحمەد شەریف دیار كر كو گەلەك جورێن ژ دەستدانێ هەنە، لێ یا زور كاریگەر مرنە، ژبەركو ئێدی ئەم ڤان كەسان نابینین، لێ ژ دەستدانا كەسەكی بو ئێكێ دیتر جیاوازە، بتایبەت كەسێن نێزیكی مروڤی و ئەندامێن خێزانێ زێدەتر كارتێكرن ل سەر مروڤی هەیە.
هەتاوێ گوت: (لێ جاران ڕەنگە ئەو كەسێ مروڤ ژ دەست ددەت ئەندامەك نەبیت ژ خێزانێ، لێ شیایە جهێ هەموو كەسان بو مروڤی پڕ كەت، لەوما ژ دەستدانا وی كەسی ژی كاریگەریەكا مەزن ل سەر مروڤی هەیە و مروڤ هەست ب ئێشانەكا كوور دكەت و مروڤی شیان نینن چ بكەت، لەوما دەروونێ مروڤی تێك دچیت).
سەبارەت چەند دەم دڤێت هەتا مروڤ ئاسایی دبیت؟ چارەسەركارا دەروونی دیار كر كو زڤرین بو رەوشا ئاسایی و خۆ گۆنجاندن ژ كەسەكی بو ئێكێ دی جیاوازە، ژبەركو ئەو ژینگەهـا مروڤ تێدا مەزن بوی و شیان و كەساتیا مروڤان ژ ئێك جودایە و گۆت: (لێ هەكە هەتا سالەكێ ژی كارتێكرن ل سەر مروڤی هەبیت نورمالە، بەس نەك ب پلەكا توند، بەلێ پشتی هینگێ هەكە ئەڤ ئازارە هەر یا بەردەوام بو ئەو كەسە پێدڤی ب چارەسەریێ یە).
چارەسەركارا دەروونی د بەردەوامیا ئاخفتنێن خۆدا دیار كر كو ئەو كەسێن بەری هینگێ تووشی چ فشارێن دەروونی نەبوین، ڤێ قوناغێ زوو دەرباز دكەن و ڤی تشتی قەبیل دكەن و خۆ دگۆنجینین و ژیانا خۆ ب ڕەنگەكێ نورمال دبورینین و گۆت: (لێ هندەكێن دیتر دەما كەسەكی ژ دەست ددەن هەست ب شوكەكا مەزن دكەن و ڤێ چەندێ قەبیل ناكەن و هەر دمیننە د ڤێ قوناغێ دا بتایبەت هەكە بەری هینگی فشارێن دەروونی بو پەیدا ببن).
هەتاوێ دا زانین ژی كو ژ دەستدانا كەسێن نێزیك مروڤی تووشی نەخۆشیێن دەروونی دكەت، بتایبەت خەموكیێ و ئەڤ نیشانە لدەف مروڤی پەیدا دبن خۆشیێ ژ چ تشتا وەرناگریت و بەردەوام یێ بێ گێولە زوو تورە دبیت حەز ژ تنێبۆنێ دكەت و پشكداریێ د هەلكەفتێن جڤاكی دا ناكەت، هەتا هزرا خۆكوشتنێ دكەت.
چارەسەركارا دەروونی هەتاو ئەحمەد زێدەتر گۆت: (ئەو كەسێن ڤێ ژ دەستدانێ قەبیل نەكەن، پێدڤیە پەنایێ ژ بو چارەسەریا دەروونی ببەن، ئەڤجا چ ب رێكا دەرمانان یان روونشتنێن دەروونی یان هەردو چارەسەریان بیت، ژبەركو تێكچونا دەروونی دبیتە ئەگەر كو مروڤ تووشی ئاریشێن لەشی ژی ببیت).
