چاوانیا خۆپاراستنێ ژ زیانێن دەرمانێن كێمیاویی
بەرپەرێ ساخلەمیێ:
د.عبدالرحمن عبدالله محسن، تایبەتمەندێ نەخۆشیێن زاروكان و خوینا زارۆكان دیاركر كو دەرمانێن كیمیاوی دو جورن، هندەك ژوان ل نەخۆشحانان دهێنە دان و ل ژێر چاڤدێریا نۆشداری، هندەك ژی وەكو حەب و شرۆب، ب تایبەت بۆ زارۆكان، ل مال دڤێت بدەنێ و سەرەدەریەكا باش دگەل بكەن، چونكو رەنگە وان دەرمانان كارتێكرنا خوە هەبیت ل سەر وی زارۆكی و ل سەر ئەندامێن خێزانێ ژی، نەخاسمە زارۆكان و دایكێن دوگیان، یان یێن شیری ددەنە زارۆكێ خوە، لەورا ل دەمێ كەسەك حەبكا ددەتە نەخۆشی دڤێت دەمێ ڤەدكەت، دەزگوركا بكەتە دەستێن خوە و باشتر ئەوە ماسكەكی ژی بدەتە بەر دفنا خوە و بەرچاڤكا ژی بكەتە بەرچاڤێن خوە، چونكو ئەو دەرمانێن كێمیاوی هندەك جارا ب بێهنێ ژی دهێنە ڤەگوهاستن، هەروەسا دەمێ دەست ژی نێزیكی وان حەبكا ببیت، رەنگە ب رێكا پیستی را كارتێكرنێ ل لەشێ مرۆڤی بكەت.
د.عبدالرحمان عبدالله محسن، دیاركر، ئەڤ پێرابوونە پێدڤیە گەلەك ب رژدی بهێنە وەرگرتن، ب تایبەت دەمێ زارۆك پێدڤی ب نیڤ حەبێ دبیت و گۆت: ئەو جهێ كو حەب لێ دهێنە ئامادەكرن بۆ زارۆكی، پێدڤیە موبەریدە و سپلێت و پانك لێ نەبن، چونكو دبیت هەوا ڤێ بكەڤیت و توز ژێ بچیت و بهێتە ڤەگوهاستن و زیانێ بكەت.
هەروەسا دیاركر، ئەو ژنێن دوگیان یان شیردەر بن، ب چو رەنگەكی نابیت خو نێزیكی دەرمانێن كیمیاوی بكەن، چونكو رەنگە كارتێكرنێ ل كورپەلێ د زكێ دایكێ دا بكەت، یان دگەل شیری زیانێ بگەهینیت زارۆكی، گۆتژی: هندەك جارا زارۆك هەنە د نەخۆشن و هەتا حەبا ژی ل نەخۆشخانێ وەردگرن، بەلێ ئەو زارۆك یێ ( حەفازە) كریە، دەمێ دایك سەرەردەریێ دگەل وێ (حەفازی) دكەت، پێدڤیە دەزگوركا بكەتێ، چونكو رەنگە قورچێن كیمیاوی دگەل دەستئاڤا زارۆكی دەربكەڤن و زیانێ ل دایكێ بكەن.
دەربارەی هەلگرتنا حەبا ژی دیاركر، باشترە ل جهەكێ سار و هشك بهێنە هەلگرتن، نابیت دناڤ سەلاجەكێ دا بیت و هەموو جورێن خوارنێ دناڤدا بن، چونكو هەكە باش نەهاتبنە پاراستن، و نێزیكی خوارنێ بكەن، رەنگە زیانێ ل خوارنێ بكەن و ب تایبەت هەكە خوارن یا بەرچاڤ بیت، و ب خوارنا وان ژلایێ ئەندامێن خێزانێ كارتێكرن لێ ببیت.
د.عبدالرحمن، دیاركر، ئەو جهێ حەب لێ دهێنە ئامادەكرن، وەكو مێز، پێدڤیە ئەو جه باش بهێتە شووشتن و پاقژكرن، داكو شوونوارێن وێ نەمینن و گۆت: دەمێ دایك یان باب حەبێ بدەتە زارۆكێ خو، باشترە دەستێن خو باش بشووت و هەكە بێی دەستی ئەو حەبكەتە سەر دەستێ مرۆڤی دەستێن خو باش ب ئاڤێ سابوونێ بشووت.
