پێدڤیە رەوشا دەروونی یا دانعەمران باش بهێتە هەلسەنگاندن
بەرپەرێ ساخلەمیێ:
د. ئاڤا غازی رشید، تایبەتمەندێ نەخۆشیێن دەروونی دیاركر تەخا دانعەمرا تەخەكا خودان رێز و گرنگە د ناڤ كومەلگەهێ مەدا، ژبەر گەلەك ئەگەرێن جودا جودا ئەڤ تەخە پێدڤی چاڤدانەكا تایبەتن د لایەنێن ژیانا واندا و ژ وان لایەنان لایەنێ دەروونی یێ دانعەمرانە و گۆت: ئەڤ تەخە وەك هەر كەسەكی دبیت تووشی تێكچوونەك ژ تێكچوونێن دەروونی ببیت وەك تێكچوونا خەمۆكیێ یان یێ قەلەق و دودلیێ بیت، یانژی تووشی تێكچوونا خەوێ ببیت، یانژی هندەك تێكچوونێن تایبەتن ب ڤی تەمەنیڤە كو تێكچوونێن دەروونی و دەمارینە، بو نموونە جورێن جودا جودا یێن خەرەفێ وەكی ئەلزەهایمەرێ كو ژ نیشانێن وێ یێن دیار تێكچوونا بیردانكێ ب شێوەیەكێ بەردەوام و گەلەك تێكچوونێن دی یێن تایبەت ب دانعەمرانڤە.
تایبەتمەندێ نەخۆشیێن دەروونی خویاكر، گەلەك ژمە هزردكەن ئەڤ گۆهورینێن چێدبن دڤان دانعەمران دا دنورمالن و گۆت: گەلەك جاران دێ پسیار كەین دێ بێژن یێ ب تەمەنە، ژبەر هندێ ئەڤ گوهۆرینە یێن چێبووین یان فلان تشت یێ ل دەڤ پەیدابووی “بێ گومان ئەڤە هزرەكا نەیا دروستە، راستە دگەل تەمەنی هندەك گوهۆرین پەیدادبن ل دەڤ مروڤی وەك دیار جەستە و دەروونێ مروڤی دا هندەك گوهۆرین پەیدادبن، بەلێ ئەڤ گوهۆرینێن دەروونێ مروڤی دا پەیدادبن ژبەر تەمەنی ئەڤە د چارچوڤەَ نورمال و ئاسایدانە، بەلێ هندەك جار هندەك گوهۆرین د دەروونێ دانعەمران دا پەیدادبن ژ چارچوڤێ نورمال دەردكەڤن و تووشی تێكچوونەكێ بوویە” نە هەر گوهۆرینەكا ل دەڤ دانعەمران پەیدابووی ژ ئەگەرێ تەمەنیە، رەنگە تووشی تێكچوونەكا دەروونی ببیت یان تووشی نەخوشیەك ژ نەخۆشیێن قەلەقێ ببیت، هەروەسا جورێن دیتر یێن تێكچوونێن دەروونی، هەر رەفتارەكا جیاواز ل دەڤ دانعەمری پەیداببیت چ گوهۆرین د شێوازێ هزركرنا وی یان شێوازێ ئاخفتنا وی پێدڤیە هەلسەنگاندن بو رەوشا وی یا دەروونی بهێتە كرن، كو دبیت تووشی تێكچوونەكێ بووی، هەروەسا دیاركر گەلەك جاران دڤی تەمەنیدا تێكچوونێن خەوێ ل دەڤ ڤان كەسان پەیدادبن و دەمێ هەلسەنگاندن بو ڤان دانعەمران دهێتە كرن دیار دبیت ئەڤ تێكچوونا خەوێ رەنگڤەدانە بو هندەك تێكچوونێن دی یێن دەروونی، بوو نمونە ئەڤ كەسە یێ تووشی خەموكیێ بووی، یان د ترسیتن یان هەر جورەك ژ جورێن قەلەقێ بیت و پتر ژ تێكچوونەكێ ل دەڤ ڤی كەسی هەبیتن.
ل دووماهیێ د. ئاڤا غازی رشید، تایبەتمەندێ نەخۆشیێن دەروونی دا دیار كرن بێگومان ئەڤ كەسە پێدڤی پالپشتیا دەروونی و جڤاكینە و پێدڤیە چاڤدێریەكا تایبەت بوو بهێتە كرن، چونكو ئەڤ تەخە یێن گەهشتینە قویناغەكا تەمەنی كو دبیت د لاوازبن د لایەنێ جەستەی یان لایەنێن دی یێن ژیانێ دا.
