پارێزگار باس ل ئامارێ و پارچەیێن ئەردی و دووكێلا موەلیدەیان و گـۆڕستانا نـوو دكەت
د. عەلی تەتەر، پارێزگارێ دهۆكێ دوهی 5/11/2024 سەرپەرشتیا كۆمبوونەكا بەرفرەهـ ل دۆر ئەنجامدانا ئامارا گشتی ل ئیراقێ و هەرێما كوردستانێ كر.
د كۆمبوونێ دا ب ئامادەبوونا ماجد سەید سالح، جێگرێ پارێزگارێ دهۆكێ و دەڤەردارێن پاریزگەهێ و رێڤەبەرێن گشتی و رێڤەبەرێن فەرمانگەهێن پەیوەندیدار بەحسێ وان كار و ئامادەكاریان كر، ئەوێن ژ لایێ رێڤەبەریا ئامارا دهۆكێ ڤە هاتینە ئەنجامدان و پێنگاڤێن دووماهیێ ژ بۆ ئەنجامدانا ڤێ پرۆسێ ب گشتی هاتە كرن.
پارێزگارێ دهۆكێ گرنگیا ئەنجامدانا ڤێ ئامارێ بەرچاڤكر و دوپاتكر، كو دڤێت هەموو وەلاتی و لایەنێن پەیوەندیدار گرنگیێ ب ڤێ ئامارێ بدەن و هەموو ئاسانكاریان بۆ تیمێن ئامارێ بكەن، داكو ئەو پرۆسە ب سەركەفتیانە بهێتە ئەنجامدان.
پاشی گەنگەشە ل دۆر بابەتی هاتە كرن و چەندین پێشنیار و بۆچوون هاتنە دیاركرن بۆ وێ یەكێ ئامار ل دووڤ بەرنامێ دەستنیشانكری بهێتە ئەنجامدان.
دهێتە چاڤەرێكرن ل رۆژێن 20 و 21 ڤێ مەهێ ئامارا گشتی ل ئیراقێ و هەرێما كوردستانێ بهێتە ئەنجامدان.
د. عەلی تەتەر، پارێزگارێ دهۆكێ پشتی كۆمبوونێ د كۆنگرەكێ رۆژنامەڤانی دا رۆهنكرن دانە سەر دووماهی بەرهەڤیێن هاتینە كرن بۆ ئەنجامدانا ئامارا گشتی ل ئیراقێ و هەرێما كوردستانێ و گرنگیا وێ بەرچاڤكر و دوپاتكر و گۆت: «دڤێت وەلاتی ب رێژەیا 100% پشكدار ببن».
پارێزگاری د وی كۆنگرێ رۆژنامەڤانی دا بەحسێ بەلاڤكرنا پارچەیێن ئەردی ل سەر وەلاتییان و فەرمانبەر و زیندانیێن سیاسی و گۆت: «ل وان جهێن پارچەیێن ئەردی هاتینە بەرهەڤكرن و تێرا وان رازیبوونێن هەی بكەن، دێ بەلاڤ كەین، ئەو جهێن پارچەیێن ئەردی ژ رازیبوونێن هەی كێمتر ژی، ل دووڤ رێزبەندیێ دێ هێنە بەلاڤكرن، ئانكو ئەوێن زوو رازیبوون وەرگرتی دێ زوو پارچەیێن ئەردی وەرگرن».
ل دۆر گۆڕستانا نوو یا دهۆكێ ژی پارێزگاری گۆت: «ل گۆڕستانا شاخكێ ل دهۆكێ ئێدی جهێ ڤەشارتنا مریا نەمایە، لەورا كار بۆ چێكرنا گۆڕستانەكا نوو دهێتە كرن، ئەو گۆڕستان ژی دێ كەڤیتە رۆژئاڤایێ دهۆكێ، ل گوندێ دولبێ، ئەو گرێ دكەڤیتە پشت فاملی مۆل، خێرخوازەك دێ دیوارەكی دەتە دۆر وی جهی، دیسا هندەك خزمەتگوزاری، وەكو جهێ شووشتنا مریان و جهێ كرنا نڤێژێ دێ لێ هێنە دروستكرن».
دیسا هەر د وی كۆنگرێ رۆژنامەڤانی دا پارێزگارێ دهۆكێ بەحسێ رێنمایێن نوو یێن كاركرنا موەلیدەیان كر و گۆت: «دەڤەردار هاتینە راسپاردن بۆ خۆرتكرن و بجهئینانا رێنمایان و سلامەتیا گشتی و دانانا فلتەرێن كێمكرنا دووكێلێ و دەنگی و ل هندەك جهان بڕیار و رێنما هاتینە بجهئینان».
