دادگەهـ چارەنڤیسێ زارۆکێ نە شەرعی دیار دکەت
بێوار حەمدی:
پارێزەرەکی بۆ ڕۆژناما ئەڤرۆ دیار کر کو زارۆکێ بێ رەچەلەک، ئانکو یێ بێ دایک و باب، یان ژی هەکە دایک هەبیت و نەزانن بابێ وی کیە یاسایێ ب شێوەیەکێ جوان و دروست سەرەدەری دگەلدا کریە.
پارێزەر ناسر حەسەن ددیدارەکێ دا بۆ ڕۆژناما ئەڤرۆ دیار کر، سەبارەت زاروکێ بێ رەچەلەک یان بێ دایک و باب یان ژی ئەگەر بتنێ دایک هەبیت سەرەدەریەکا باش ژلایێ یاسایێ ڤە دگەل هاتیە کرن و گۆت: (یاسایا کارتا نشتیمانی یا ژمارە 3 یا سالا 2016 ژ ماددێ 20 ل بڕگا ئێکێ دبێژیت: دادگەها سنێلان بشێوەیەکێ نهێنی دێ کۆپیەکێ ژ وێنێ بڕیارا دادگەهێ فرێکەت بۆ وەزارەتا ساخلەمیێ و ڕێڤەبەریان، ژبو بدەستڤەئینانا باوەرناما ژ دایکبۆنێ بۆ ڤی زارۆکی و دیارکرنا ڕۆژا ژ دایکبۆنێ و جهێ ژ دایکبونا زارۆکی).
پارێزەری سەبارەت برگا دووێ ژ هەمان ماددە گۆت: ( ئەڤ زارۆکە دێ بیتە ئیراقی و موسلمان ب مەرەما هندێ کۆ ل ئیراقێ ژ دایکبۆیە و هەکە زارۆکی پازدە سال تەمام کربن ئەو بخۆ دشێت داخوازیەکێ پێشکێشی دادگەها سنێلان بکەت بۆ دیارکرنا ڕەچەلەک و ڕۆژا ژدایکبونا خۆ).
ناسر حەسەن د بەردەوامیا ئاخفتنێن خۆدا دیارکر کو یاسایا پاراستنا سنێلان ژی یا ژمارە 76 یا سالا 1986ــێ یا ڕاستڤەکری گرنگیەکا مەزن دایە ڤی بابەتی کو ماددێ 39ــێ ژ ڤێ یاسایێ دبێژیت: هەکە دوو هەڤژینان زارۆکەکێ بێ ڕەچەلەک یان نەدیار ڤیا کو ببیتە یێ وان و خۆدان بکەن دێ داخوازیەکێ پێشکێشی دادگەها سنێلان کەن و دادگەھ دێ سەحکەتە ڕەوشا وان یا هەڤژینی و سلامەتیا وان و پاشی دێ بریارێ دەت ب شێوەیەکێ کاتی بۆ ماوێ شەش هەیڤان زارۆکی بدەتێ و گۆت: (د ماوێ وان شەش هەیڤان دا ڤەکۆلەرێ جڤاکی دێ سەرەدانا وی زارۆکی کەت کا رەوشا وی یا چاوایە و دێ ڕاپۆرتەکێ دەتە دادگەهێ و دێ دەدگەهـ بریارا دووماهیێ دەت کا زارۆکی بدەتێ یان ژێ وەربگریت).
