ل دهۆكێ رێژەیا تووشبوونێ ب پەنچەشێرێ بەر ب زێدەبوونێ یە
دلۆڤان ئاكرەیی
گرتنا دەرگەهێن پالاوگەهێن نەیاسایی و جێبەجێكرنا مەرجێن ساخلەمیێ دێ بیتە دەرئەنجامێ پاقژبوونا ژینگەهێ و كێمبوونا نەساخیێن مینا سینگی و پەنچەشێرێ. رێڤەبەرێ گشتیێ ساخلەمیێ دبێژیت: دهوك باژێرەكە دناڤ چالەكێدایە و دەوروبەرێن وێ ب چیایا هاتیە گرتن، بەلێ دبەرێدا هەوا ب ئاسایی ل ناڤا باژێریدا دهات و دچوو و لڤین دكر، لێ نوكە ژبەر ئاڤاكرنا خانیێن زۆر و تاوەرێن بلند و زۆرییا ترومبێل و ژمارەیا زۆرا ئاكنجی و كارگەهان دناڤا سەنتەرێ باژێریدا بوویە سەدەم هەوا دناڤ باژێرێ دهوكێ د چالێدا بمینیت و كارتێكرنا خۆ بكەت.
دلشاد عبدولرەحمان رێڤەبەرێ ژینگەها دهۆكێ بۆ رۆژنامەیا ئەڤرۆ دیار كر، پشتی كۆمبوونا گرنگ یا دناڤبەرا سەروكوەزیر و جڤاتا وەزیران و پارێزگار و سەرپەرشتێن ئیدارەیێن سەربەخۆ یێن هەرێمێ، چەندین بریارێن گرنگ هاتنە دان و پاشی پارێزگارێ دهۆكێ كۆمبوونەك ل گەل دەڤەردار و رێڤەبەرێن گشتی و دەزگەهێن ئەمنیێن گرێدایی پاراستنا ژینگەهێ هاتە سازكرن و بریار هاتە دان ب دائێخستنا دەرگەهێن پالاوگەهێن كواشێ یێن نەیاسایی و دووڤچوونا موالیدە و راكرنا هندەك ژ وان و گوهۆرینا هندەك ژ وان ب یێن دروست و سزادانا سەرپێچیكاران و چاڤدێریكرنا كەسێن ب كارێ پیسكرنا ژینگەهێ و هەوا و ئاڤێ و چاندنا بەرهەمان ل بەر ئاڤا نە تەندروست رادبن رێگری ل وان بهێتە كرن.
دلشاد عەبدولرەحمان زێدەتر گۆت: ژبلی دووكێلا پالاوگەهێن نەیاسایی ل كواشێ، دووكێلا ترومبێل و موالیدە و سۆتنا بەرمایكان مینا یێن كیمیایی و یێن چاندنێ ژی كارتێكرنا وان ل سەر ژینگەهی هەیە كۆ ل رۆژێن هاتی دێ رێگری ل ڤان هەمی كاران ژی هێتە كرن و گۆت: دەركەڤتنا ڤان هەموو بریارا و دووڤچوونان ژلایێ سەرۆكێ حكومەتێڤە ئاماژەیە بەرێزی گرنگیەكا مەزن ب پاراستنا ژینگەهی و گیانێ وەلاتیان و تەندروستیا وان ددەت ژ بۆ دووربوونا وان ل تووشبوون ب نەساخیان و جودا ژێ ڤێ كاری ژی بۆ ژینگەهەكا تەندروست دكەت.
د. ئەفراسیاب موسا، رێڤەبەرێ گشتیێ ساخلەمیا پارێزگەها دهۆكێ سەبارەت ژینگەها دهۆكێ و تووشبوون ب نەساخیێن جودا بۆ رۆژناما ئەڤرۆ گۆت: ئاریشەیا پیسبوونا ژینگەهێ بوویە ئاریشە ل سەرانسەری جیهانێ و پارێزگەها دهوكێ ژی پشكەكە ژ وێ و ئاشكرا ژی كر، ل هەرێما كوردستانێ ژ ئەگەرێ چەند سەدەمان ژینگەها وێ بەر ب پیسبوونێ چوویە، مینا زێدەبوونا رێژا ترومبێل و ب كارئینانا سۆتەمەنیێ كۆ ژلایێ كوالیتییێڤە و جۆریڤە دباش نینن و ل دیڤ ستاندارێن جیهانی نینن و ڤەرێژا وان ژی كارتێكرنێ ل هەوا و چاندنێ دكەت و دبیتە ئەگەر كو كارتێكرنێ ل ئەرد و ئاڤ و هەوای دكەت.
ناڤبری زێدەتر ل دور پیسبوونا ژینگەهێ گۆت: د ڤەكۆلینێن جیهانێدا هاتییە كو دووكێل و پیسبوونا ژینگەهێ ئێك ژ ئەگەرێن تووشبوون ب پەنچەشێرێیە و چەندین نەساخیێن دی ژی مینا رەبو و بێهنتەنگییێ و ئەگەر ئەوە و گۆت ژی، ژبەر پیسبوونا ژینگەهێ ل دهۆكێ، د نوكەدا رێژا پەنچەشێرێ ل پارێزگەها دهۆكێ زێدەبوویە.
كارزان رەئوف رێڤەبەرێ نەفت و كانزایان ل پارێزگەها دهوكێ بۆ رۆژناما ئەڤرۆ گۆت: پشتی سەروكێ حكومەتێ بریاردای ب گرتنا دەرگەهێن پالاوگەهێن نەیاسایی بۆ پاراستنا ژینگەهێ، دەرگەهێ هەر 50 پالاوگەهێن نەیاسایی یێن ل كواشێ هاتنە گرتن، ژبەر نەبوونا مەرجێن یاسایی و جێبەجێنەكرنا رێنمایێن گرێدای ستانداردێن جیهانی و قەبارەیێ وان د بچیك و مەزن بوون و گۆت: ب تنێ ل هەرێما كوردستانێ سێ پالاوگەهێن یاسایی هەنە كۆ مۆلەتا فەرمی هەیە و پێگیری ب رێنمایێن لایەنێن پەیوەندیدار دكەن، ئەو ژی پالاوگەهێن كار و لاناز و قەیوانن.
