دهۆك یا پاقژە ژ ئەنفلاوەنزا مریشكان
هیلین سالم
وەزارەتا چاندنا ئیراقێ بریار دایە نابیت مریشكێن ساخ یێن پارێزگەهێن هەرێما كوردستانێ بۆ پارێزگەهێن دی یێن عیراقێ بهێنە هنارتن، ئەڤە دێ دەمەكی دایە ل هندەك دەڤەرێن دەرڤەی ئیراقێ وەك توركییا ئەنفلاونزا مریشكان بەلاڤ بوویە.
ئەمین عبدالرحمان، سەروكێ كۆمەلا گارە یا بەرهەم ئینان و خودانكرنا پەلەوەران ل پارێزگەها دهوكێ بۆ رۆژنامەیا ئەڤرۆ دیار كر: ل دهۆكێ ٣٥٥ پروژێن مریشكان هەنە كو دبنە ٤٨٢ هۆل و رێژەیەكا مەزنا مریشكان دهێنە بەرهەمئینان، هەروەسا چوار پرۆژێن هێكا هەنە بەرهەمێ وان دبنە ٤ هزار كارتون د روژەكێ دا، لێ خەلكێ دهۆكێ پێدڤی ب هزار و ٧٠٠ تا دوو هزار كارتونێن مریشكا هەیە و رۆژانە ب ڤێ یەكێ بەرهەمێ مریشك و هێكان ل دهۆكێ یێ زۆرە.
گۆت ژی: ئەگەر ئەڤ بریارا حكومەتا عیراقێ گەلەك بهێتە درێژ كرن، دێ گەلەك زیان ب خودانێت پروژێن هێك و مریشكان كەڤن، ئەو دخوازن ئەڤ بریارا حكومەتا عیراقێ هەر زووی ب داوی بهێت.
ئەمین عبدالرحمان دیار كر كو دهۆك یا پاقژە ژ بەلاڤ بوونا ئەنفلوانزا مریشكان و چ حالەت نەهاتینە تومار كرن، دەربارەی بهایێ مریشكان ژی گۆت: هێشتا بهایێ وان وەكی خویە كو كیلو ب دوو هزار تا دوو هزار و ١٠٠ دینارا یە، بەلێ ئەگەر ئەڤ بریارە درێژ بیت، هەلبەت بازار دێ كێم بیت و بهایێ مریشكان دێ ئەرزان بیت.
