بازاڕەكێ تایبەت ب مەها ڕەمەزانێ ڤە ل زاخۆ دێ هێتە ڤەكرن
زاخۆ، دلۆڤان هالۆ:
لەتیف عوسمان، بەرپرسێ نڤیسینگەها ژوورا بازرگانی ل زاخۆ بۆ ڕۆژناما ئەڤرۆ دیار كر كو بۆ ئێكەم جار ل ئیدارەیا سەربخوە یا زاخۆ بازاڕەكێ تایبەت ب مەها ڕەمەزانێ ڤە دێ هێتە ڤەكرن.
بەرپرسێ نڤیسینگەها ژوورا بازرگانی ل زاخۆ، ئاماژە ب وێ چەندێ ژی كر كو ئەو بازاڕە دێ یێ تایبەت بیت ب فرۆتنا ئاهێن خوارنێ و چەرەزات و شریناهی و سپیاتی و هەمی پێدڤیێن ڕۆژانە یێن مەها ڕەمەزانێ.
لەتیف گۆت: «ئەڤ بازاڕە دێ ل بەرامبەر زانكۆیا زاخۆ هێتە دانان، چەندین كۆمپانی دێ پشكداریێ د ڤی بازاڕی دا كەن، ئەڤ بازاڕە دێ بۆ خەلكی یێ ب مفا بیت، چونكی دێ بهایێن كەلوپەلان د گونجایی بن».
