لەشكرێ توركیا پڕانیا خانیێن چـار گوندێن دەڤەرا دێرەلۆكێ ژناڤبرینە
ئامێدیێ، مەحمود نهێلی:
پتر ژ دەهـ رۆژایە لەشكرێ توركیا بۆردومان و تۆپبارانێن خوە بۆ سەر دەڤەرا بەرێ گارێ زێدەكرینە و ل دووڤ پێشبینیان، چێدبیت توركیا ئۆپەراسیۆنەكێ ل وێ دەڤەرێ ئەنجام بدەت.
ئێك ژ وەلاتیێن گوندێ بلاڤە بۆ رۆژناما ئەڤرۆ دیار كر، ئەڤە دەهـ رۆژە بەردەوام فڕۆكە و تۆپخانەیێن لەشكرێ توركیا چەندین گوندێن دەڤەرا بەرێ گارێ ل سنوورێ ناوچەدارییا دێرەلۆكێ بۆردومان دكەن و گۆت: «رۆژانە گوندێن سپیندارێ و مژێ و كەڤنە مژێ و گرگاش و گوندێن دی یێن دكەڤنە پشتا گەلیێ شێرانە دهێنە بۆردومانكرن، ل هندەك گوندان تەڤایا ئاڤاهی و خانیێن وان هاتینە ژناڤبرن».
وی وەلاتی دیار ژی كر، ئەڤان بۆردومانان وەلاتی و خەلكێ ڤان گوندان بێزار كرینە، ئەڤ هەر چار گوندێن هنداڤی سپنەی ژ ئەنجامێ شەڕێ پەكەكێ و توركیا هاتینە چۆلكرن و خەلكێ وان بەر ب دێرەلۆكێ و كوانێ و دهۆكێ چووینە و گۆت: «ئەڤ بۆردومانا بەردەوام نیشانا هندێ یە، لەشكرێ توركیا دڤێت ئۆپەراسیۆنەكا پەیادە ل وێ دەڤەرێ ئەنجام بدەت، ب ڤێ یەكێ ژی دێ پتر بەرپێن خەلكێ ڤان گوندان تەنگ بن و پتر كارتێكرن ل وەلاتیێن دەڤەرێ هێتە كرن».
