پارێزگەها دهۆكێ دێ ب هێزترین سۆپەرا ئیراقێ مێڤان كەت
د داخویانیەكێ دا ئەندامێ فدراسیۆنا كیك بۆكسینگا ئیراقێ دیار كر ب فەرمی پارێزگەها دهۆكێ دێ مێڤاندارییا قارەمانییا سۆپەرا ئیراقێ كەت، ئەوا بڕیارە هەڤڕكیێن وێ ل 20هەتا 22ێ ڤێ مەهێ بهێنە كرن.
مەحفۆز ئیبراهیم كو هەڤدەم دا سەرۆكێ فدراسیۆنا كیك بۆكسینگا پارێزگەها دهۆكێ یە بۆ رۆژنامەیا ئەڤرۆ گۆت: ب فەرمی باژێرێ دهۆكێ دێ مێڤاندارییا ئێك ژ مەزنترین و ب هێزترین قارەمانیێن ل سەر ئاستێ ئیراقێ كەت كو تایبەت بۆ یاریزانێن وەرزێ 2024ێ دگەل هەلبژارتیێ ئیراقێ و ئەو یاریزانێن لڤێ دووماهیێ بووینە باشتریین و ناسناڤ دەستڤە ئیناین، بڕیارە قارەمانی ل پێنج شەمبییا بهێت ل سەر ئاستێ كوڕان پێشكەفتیان بۆ سێ سیستەمان ئەو ژی،( full contact – k1 – point fighting) بۆ ماوەیێ سێ رۆژان ل سەر 12 كێشان شەڕی دێ بۆ ناڤر ِێزێن هەلبژارتیێ ئیراقێ بۆ وەرزێ 2025ێ هێتە كرن پێخەمەت پشكداری د قارەمانیێن عەرەبی، ئاسیا و دەرڤە دا.
هەروەسان ناڤهاتی گۆت: قارەمانی یا ڤەكری نینە كو هەر یاریزانەكی بڤێت پشكداربیت بەلكو ژلایێ لژنەیەكا هونەری و ل دووڤ هەلسەنگاندنا وان هاتینە ژێگرتن و خودان كەمەرا قەهوایی بیت، بۆ هەردو سیستەمێن فۆل كۆنتاك و كەی وان ژ كێشا 51كگم هەتا دگەهیتە +91كگم، لێ بۆ سیستەمێ پۆینت فایكین ژ كێشا 54كگم هەتا دگەهیتە +94كگم، هەموو یاسا دێ ل دووڤ بەندێن فدراسیۆنا نیڤدەولەتی wako بن، هەروەسان دێ ڤاڤاتن ل سەر ئاستێ كچان ژی هێنە كرن بۆ هەلبژارتیێ ئیراقێ.
ژلایەكێ دووڤە مەحفۆز ئیبراهیمی دیاركر كو ل پارێزگەها دهۆكێ هێشتا هژمارەیا دروست یا یاریزانان بۆ پشكداریێ د قارەمانیێ دا دیار نینە لێ پێشبینی دكەم رێژەكا باش پشكدارن ل سەر هەردو ئاستێن كوڕان و كچان و گۆت: ئەڤ قارەمانییە باشترین دەلیڤەیە بۆ كوڕ و كچێن مە یێن وەرزشڤان پشكداریێ تێدا بكەت و پلێتا ناڤ رێزێن هەلبژارتیێ ئیراقێ وەربگرن و من ب خوە باوەری ب كۆمەكا باش یا یاریزانان هەنە كو ب گەهنە ئارمانجا خوە.
ژلایێ خوەڤە سالح كەكۆ ڕاهێنەرێ هەلبژارتیێ ئیراقێ و یانەیا دهۆك دیاركر دو یاریزانێن یانەیا دهۆكێ و ئێكێ یانەیا زاخۆ و شەش یاریزانێن كچ یێن یانەیا دهۆك وەكو یاریزانێن ستێر و ژێگرتی دێ پشكداریێ د سۆپەرێ دا كەن ژبۆ وەرگرتنا پلێتا هەلبژارتیێ ئیراقێ.
