ئسرائیل سەبارەت ب هەسەدێ داخوازەکێ ژ ئەمریکا دکەت
وەزیرێ دەرڤە یێ ئسرائیلێ ل گەل هژمارەک ژ سیناتۆرێن ئەمریکی کۆمبوو و پشتی کۆمبوونێ ژی راگەهاند کو نها رەوشەکا گەلەک جودا ل سووریێ هەیە، رژێما بەشاری نەمایە و هەروەسا ژ بەر گوهۆڕینێن نها ل سووریێ مەترسیا بهێزبوونا داعشێ ژی هەیە، مەترسی ل سەر هێزێن سووریا دیموکرات ژی هەنە و ژ بەر ڤێ یەکێ ژی ڤەکێشانا هێزێن ئەمریکا ل سووریێ د دەمێ خوە دا نینە و هەکە ئیدارا ترامپ بریارەک وەسا بدەت دێ ئەنجامێن خوە یێن خراب بۆ بەرژەوەندیێن ئەمریکا ژی هەبن و باشترە جارێ هێزێن ئەمریکا ل سووریێ بمینن.
گیدۆن سار ئەو یەک ژی دیار کریە، هێزێن سووریا دیموکرات د شەڕێ ل دژی داعشێ دا گەلەک هاریکاریا ئەمریکا و وەلاتێن دی یێن هەڤپەیمانیا شەڕێ ل دژی داعشێ کرن و گەلەک قوربانی دان، نها ژی دڤێت ئەمریکا پتر ژ جاران هاریکاریا هێزێن سووریا دیموکرات بکەت و وەکو ئسرائیل مە پێ باشە جارێ هێزێن ئەمریکا ل سووریێ بمینن.
