ئێک ژ دامەزرێنەرێن ئاکپارتیێ هۆشداریێ ددەتە ئەردۆغانی
ئێک ژ دامەزرێنەرێن ئاکپارتێ و سەرۆکێ بەرێ یێ پەرلەمانێ تورکیا دیار دکەت، هەکە ئاکپارتی و ب تایبەتی ژی ئەردۆغان دەست ب گوهۆڕینێن مەزن نەکەن و پرسا کوردی و قەیرانا ئابووری نەهێنە چارەسەرکرن د هەلبژارتنێن بهێت دا ئاکپارتی دێ تووشی شکەستنەکا مەزن بیت.
بولەنت ئارینچ ئێک ژ دامەزرێنەرێن ئاکپارتیێ و سەرۆکێ بەرێ یێ پەرلەمانێ تورکیا د داخۆیانیەکێ دا بۆ دەزگەهێن راگەهاندنا تورکیا دیار کر، د هەلبژارتنێن ٣١ ئادارا سالا بۆری دا ئاکپارتی تووشی شکەستنێ بوو و مخابن هەتا نها بەرپرسێن ئاکپارتیێ خواندنەکا راست و دروست بۆ ئەگەرێن وێ شکەستنێ نەکرینە و گۆت: (د هەلبژارتنێن هەری دووماهیێ دا مە دیت کو ئاکپارتی ل گەلەک باژێرێن مەزن یێن تورکیا باژێرڤانی ژ دەست دان و هەروەسا نها ئاکپارتی پارتا ئێکێ ژی نینە و پارتا کۆماریا گەل رۆژ ب رۆژێ پتر پێگەهێ خوە د ناڤ خەلکی دا بهێز دکەت، ئاکپارتی د ڤان چەند سالێن دووماهیێ دا ژ گەلەک تشتان دوور کەفتیە، نها بابەتێ ئازادیا راگەهاندنێ و سەربخوەیا دادگەهان دا گەلەک ئالۆزی هەنە، هەروەسا د سیاسەتا دەرڤە دا تورکیا گەلەک تەنگاڤ بوویە).
ناڤهاتی ئەو یەک ژی دیار کر، نها تورکیا د قەیرانەکا گەلەک مەزن یا ئابووری دایە، هەر چەندە دەست ب قۆناغەکا نوو هاتیە کرن و بەحسێ ئاشتیێ و چارەسەرکرنا پرسا کوردی ل تورکیا دهێتە کرن، لێ ب کریاری هەتا نها چو نەهاتیە کرن و دەستەسەرکرنا سیاسەتمەدارێن سەر ب پارتا دەم ئاریشەکا گەلەک مەزنە و هەکە رەوش وەسا بەردەوام بکەت دێ د هەلبژارتێن بهێت دا ئاکپارتی تووشی شکەستنەکا مەزن بیت و دڤێت ئەردۆغان ڤان راستیان باش بدەتە بەرچاڤ و دەست ب گوهۆڕینێن پێدڤی بکەت و گۆت: (تشتێ نها ئەز دبینم گەلەک کەس ژ رەوشا نها یا ژیانا خوە رازی نینن، مخابن هەتا نها دەستهەلاتێ ژی نەشیایە قەیرانا ئابووری چارەسەر بکەت و رەوش خرابتر لێ دهێت، هەکە گوهۆڕینێن پێدڤی نەهێنە کرن د هەلبژارتنێن بهێت دا ئاکپارتی دێ گەلەک دەنگان ژ دەست دەت و ئەو یەک ژی مەترسیەکا مەزنە و دڤێت ئەردۆغان هەر زوو دەست ب گەلەک گوهۆڕینان بکەت).
سەرۆکێ بەرێ یێ پەرلەمانێ تورکیا ئاماژە ب ڤێ یەکێ ژی کر، ژ بۆ ئاشتیێ و چارەسەرکرنا پرسا کوردی بەری نها ژی هندەک تشت هاتنە کرن لێ چو ئەنجامێن خوە نەبوون، هیڤیدارم ڤێجارێ کارەک وەسا بهێتە کرن کو ئێدی شەڕ د رۆژەڤا تورکیا دا نەمینیت، چونکی براستی ژی خەلکی ئاشتی، ئارامی و ژیانەک هەژی دڤێت، ئەرکێ دەستهەلاتێ یە یا پێدڤی بۆ خەلکی بکەت، هەکە دەستهەلاتا نها کارەک وەسا نەکەت دڤێت چاڤەرێ دەنگێ خەلکی ژی نەبیت، چونکی براستی ژی خەلکێ تورکیا د رەوشەکا خراب دایە.
