ب هەلكەفتا رۆژا زمانێ دایكێ پرتووكا شیرێ دایكێ هاتە ئیمزاكرن
دهۆك، لەزگین جوقی:
ب ئامادەبوونا د. ئەفراسیاب موسا، رێڤەبەرێ گشتیێ ساخلەمیا پارێزگەها دهۆكێ و سەرۆكێ سەندیكا نۆشدارێن كوردستانێ تایێ دهۆكێ و نوونەرێ لقێ ئیك یێ پارتی و هژمارەكا نۆشدارێن دهۆكێ، سەندیكا نۆشدارێن كوردستانێ تایێ دهۆكێ ب هەلكەفتا رۆژا زمانێ دایكێ پرتووكا شیرێ دایكێ بەلاڤكر و هاتە ئیمزاكرن.
د. شڤان سەعید، نڤیسەرێ پرتووكا شیرێ دایكێ بۆ رۆژناما ئەڤرۆ ئاشكرا كر، وان دڤیا ب هەلكەفتا رۆژا زمانێ دایكێ پرتووكا شیرێ دایكێ بەلاڤ بكەن و گۆت: «مە ب فەر دیت گرنگیا شیردانا دایكێ بۆ زارۆكان بكەینە پرتووك و ب زمانێ كوردی چاپ و بەلاڤ بكەین، مەرەما مە ئەوە، دەیك شیرێ خۆ بدەنە زارۆكێن خۆ، ژ بەركو شیرێ دایكێ بۆ گەشەپێدانا زارۆكان و پاراستنا ساخلەمیا وان گەلەكێ گرنگە و چەندین ماددەیێن ب مفا د ناڤ دا هەنە».
د. شڤان سەعید گوتژی: «شیرێ دایكێ پتر ژ 300 ماددەیێن ب مفا د ناڤ دانە، شیرێ دایكێ دشێت هەموو پێدڤیێن زارۆكێ بۆ مەزنبوونێ دابین بكەت، هەتا شەش هەیڤیێ گەلەك یا گرنگە دایك بەردەوام شیرێ خۆ بدەتە زارۆكی».
د. نزار بەكر، رێڤەبەرێ نەخۆشخانا هیڤی یا زارۆكان چەندین زانیارێن گرنگ ل سەر شیردانا دایكێ دانە بەرهەڤبوویان، پاشی پرتووك هاتە ئیمزاكرن.
