وه‌لاتێ چینێ ده‌ستێ خوه دانایه سه‌ر كاریگه‌رترین كارێن جیهانێ
ته‌ماشه‌ی وه‌لاتێ چینێ بكه‌ن، شیا د ماوێ 50 سالێن بوری دا، ژ ئێك ژ لاوازترین وه‌لاتێن جیهانێ ژ لایێ ئابوورێ ڤه، ببیته ئێك ژ مه‌زنترین وه‌لاتێن زلهێز ل جیهانێ كو نها ژ لایێ ئابووری ڤه ل رێزا دویێ دهێت. ئه‌وێ نها ب 19 ترۆلیۆن دۆلاران دهێته خه‌ملاندن، ئانكو هندی ئابووری 27 وه‌لاتێن ئورۆپی. نها چین په‌ناگه‌ها 2000 كۆمپانیێن مه‌زن یێن جیهانی یه كو ژ ده‌رزیكێ هه‌تا كراسێ بیكێ به‌رهه‌م دئینن.
نها ژ سه‌رجه‌مێ 44 هه‌ستیارترین كاران ل جیهانێ كو كه‌رتێن ئه‌سمانی و ته‌كنۆلۆژیایێ و له‌شكری و ساخله‌می و خوارندن و پێشه‌سازی و به‌ره‌ڤانیێ و گه‌له‌ك كه‌رتێن دی ب خوه ڤه دگریت، چین د 37 كاران دا ل پێشیا ئه‌مریكا و ئورۆپا دهێت.
یا دیاره ژی نها ل كه‌رتێ ترۆمبێلان و زیره‌كا ده‌ستكرد و هه‌تا زانینێ ژی ل پێشییێ یه و خودانا پترترین هه‌نارده‌یه ل جیهانێ كو دگه‌هیته 3.4 ترلیۆن دۆلاران.
تشتێ ژ هه‌موویێ گرنگتر نها چین بزاڤێ دكه‌ت هه‌بوونا خوه ل ئه‌فریقیا ب هێز بكه‌ت و ڤێ ژی مه‌ترسیه‌كا مه‌زن خستیه دلێ ئورۆپا و ئه‌مریكا. چین یا ب ره‌نگه‌كێ گه‌له‌ك به‌رچاڤ ره‌هێن خوه د هه‌موو جیهانێ دا دچینیت و گه‌له‌ك نه‌مایه دێ كۆنترۆلا ئابۆرا جیهانێ كه‌ت.
گه‌له‌ك جاران به‌حس ل وێ چه‌ندێ دهاته كرن كو هه‌كه كه‌رسته‌كی ئه‌ڤ نڤیسینه ل سه‌ر بیت (چێكریێ چینێ یه ، Made In China) ئانكو یێ ب كێر نه‌هاتیه و خوه ژێ بده‌نه پاش. ب ره‌نگه‌كی گه‌هشته وی راده‌ی كو كه‌سه‌ك ژ مه ل مال نینه كومه‌كا كه‌رستان نه‌بیت ئه‌ڤ نه‌ڤیسینه ل سه‌ر نه‌بیت.
