پتریا جۆرێن زەرکێ پێدڤی ب دەرمانان نینن
د. عەلی محەمەد خالد، تایبه‌تمه‌ندێ نه‌خۆشیێن زارۆكان دیاركر كو زه‌رك ل ده‌ڤ زارۆكان ب تایبه‌ت زارۆكێن ئێك رۆژی هه‌تا حه‌فتیه‌كێ گه‌له‌ك یا به‌لاڤه‌یه و دورێن 60-70% بۆ وان چێدبیت و گۆت: هنده‌ك ره‌فتار دگه‌ل وان دهێنه كرن وه‌كو ئه‌م دبینین بۆ نموونه دایك دێ بێژیت ئه‌م رۆژانه یان رۆژێ دو جارا سه‌رێ زارۆكی دشووین داكو زه‌ركا وی بچیت، ئه‌ڤه شاشیه و ئه‌م دبێژینه وان ئه‌ڤه نه پاته‌كه یێ زه‌ربووی دێ ب رێكا شووشتنێ چیت، ئه‌ڤه یا دناڤ خوینێ دا.
هه‌روه‌سا دیاركر گه‌له‌ك دایك زارۆكێن خۆ دهێلنه ل به‌ر سه‌رمایێ ب به‌هانا وێ چه‌ندێ كو سه‌رما ره‌نگێ زارۆكی ڤه‌دكه‌ت و زه‌رك دچیت، ئه‌ڤه‌ژی شاشیه‌كه و دبیته ئه‌گه‌ر زارۆك تووشی سه‌رمایێ ببیت و ده‌مێ زاروكی دداننه به‌ر سه‌رمایێ خوینا وی د قه‌رسیت له‌ورا ره‌نگێ وی ڤه‌دبیت، ژ ئه‌نجامێ ڤێ چه‌ندێ هه‌ودان بۆ زارۆكی په‌یدادبن.
د. عەلی محەمەد خالد، تایبه‌تمه‌ندێ نه‌خۆشیێن زارۆكان دیاركر ژی، ئێك ژ شاشیێن دی ئه‌وه دایك دێ گلوپه‌كێ ئینن مال و زارۆكی داننه به‌ر، مه دڤێت ئه‌م دیاربكه‌ین ئه‌و گلوپا ل نه‌خۆشخانا دهێته ب كارئینان ئه‌و یا تایبه‌ته ب چاره‌سه‌ریێ ڤه و نه گلوپه‌كا نورماله، له‌ورا ڤان هه‌رسێ شاشیان چ په‌یوه‌ندی ب چاره‌سه‌ریا زه‌ركێ ڤه نینه.
ل دۆر ئه‌گه‌رێن زه‌ركێ، د.علی دیاركر كو پتریا جاران تشته‌كێ فزیولوژی یه كو مێلاك هێشتا نه‌گه‌هشتیه ب دروستی كارێ خۆ بكه‌ت، له‌ورا زه‌راتی په‌یدادبیت هه‌تا مێلاك ب دروستی كاردكه‌ت و زه‌راتی نامینیت كو پتریا جارا بۆ ده‌مێ حه‌فتیه‌كێ ڤه‌دكێشیت و زه‌رك نامینیت و زه‌ركا وان زێده‌نابیت و پێدڤی ب چ چاره‌سه‌ریێ نابن.
هنده‌ك جورێن دی یێن هه‌ین كو كارتێكرنا خوینێ یه، بۆ نموونه خوینا دایكێ نێگه‌تیف بیت و یا زارۆكی پوزه‌تیف بیت، یان جوری O+ یان O دگه‌ل ئه‌ی و بی ئه‌ڤ جوره گه‌له‌ك زێده‌دبیت و هنده‌ك جارا هه‌تا بیست رۆژا یان هه‌یڤه‌كێ دمینیت و زارۆك پێدڤی ب چاره‌سه‌ری و چاڤدێریێ دبیت، له‌ورا شیره‌تا مه بۆ دایكان ئه‌وه هه‌كه دیت رۆژێن ئێكێ ژ دایكبوونێ زه‌رك ل زارۆكی دیاربوو یا دروست ئه‌وه پشكنین بۆ بهێنه‌كرن و ئه‌گه‌ر بهێنه زانین و پتریا وان پێدڤی ب چاره‌سه‌ریێ نابن و هه‌كه پێدڤی ب چاره‌سه‌ریێ ژی بوو ب رێیا گلوپه‌كا تایبه‌ت و شیردانێ كو بزاڤا رووڤیكان به‌رده‌وام هه‌بیت و ژبلی ڤێ هنده‌كێن گه‌له‌ك كێم پێدڤی ب گوهورینا خوینێ دبن.
