ل ئەمنا كەركووكێ هەمی زیندانیان كنفا سێدارەیێ دڤیا و ب دەست نەدكەفت
سالار محەمەد دۆسكی:
4- 4
هەر دو زیندانیێن سیاسی ئەو ژی ئاشكراكر كو دەمێ هاتینە زیندانكرن ل بەغدا چ هەلكەفتێن نەتەوەیی نەدهاتنە ساخكرن، وەك نەورۆز یان هەر رۆژەكا دی یا هەبا و بەلێ ئەوان سەبرا خوە ب گوهداریكرنا ئێزگێ دەنگێ كوردستانێ دئینا و گەلەك دەنگۆباس و روودان و چالاكیێن پێشمەرگەی ب رێكا ئێزگەی گەهشتنێ و هەتا گەلەك جاران هایدار رەوشێ دەڤەرێ دبووینە، و دەمێ مرۆڤێن وا سەرەدانا زیندانێ دكر ئەوان دەنگۆباسێن ب رێكا ئێزگەی گوهداریكرین بوو، خەلكی ڤە دگوهاستن و خارزایەكێ مە یێ هدێنەی بوو بناڤێ( شەعبان) شەهید ب بوو و ب رێكا ئێزگەی مە زانی و مە بۆ مالێن خوە گۆتن دەمێ سەرەدانا مە كرین ل زیندانێ و رادیوو ل زیندانێ ل دەف هندەك هەڤالێن مەیێن هروری بوو ئەوا پێزانین هەمی بوومە دگۆتن و زێدەتر مە ل گورەپانا زیندانا ئەبو غورێب گوهداری یا ئێزگەی دكر، و حەسەن عەلی خەنجەر جارا ئێكێ سزایێ وی ب دوماهی هات بوو و هاتبوو ئازادكرن بەری لێبورین بهێتە دەركرن، و حەسەن ئەو و ئەوێن هروری ل هولەكا دی بوون و مە زانی ئەو هاتیە ئازادكرن، بەلێ وەك مە ئاماژە پێكری ل گورەپانا زیندانێ مە گوهاری دكر، و دیسا بتنێ ئەم كورد تێگەهشتین رادیۆیا ئێزگێ دەنگێ كوردستانێ و عەرەبا نەزانی چ بێژیت، و هەتا ڕادەكی مە باوەری ب ئێك دو دهات و ژ هەمی جوران ل زیندانێ دا هەبووینە كورد، عەرەب، توركامان، هەمی ئاین و مەزهبا و هەمی ئالیگرێن پارتێن سیاسی و زێدەتر نەخوشیا مە هەمیا ئێك بوو و ژ ڤەرێژا كارێن سیاسی و ئالیگریا دوزا مللەتێ خوە ئەم هاتبووینە زیندانكرن و ئەگەر ل زیندانێ هەر مە ئێكێ كورد دیتبا بوومە خوش بوو و ئەگەر مە ئێكێ پارێزگەها دهۆك دیتبا هەر خوشتر بوو ئانكو خوشیی دێ وێ چەندێ دا بوویە زمان و كەلتور و نەتەوا تەبوویە دەمێ تە دیت هەتا رادەكی ئەم ئارام دبووین و نابێژم خەلكێ هەولێر و سلێمانیێ و كەركووكێ نەباش بوون بەلێ پتر سەبرا مە ب خەلكێ دەڤەرا مە دهات و مە زێدەتر خوەشیی ژێ وەردگرت و پشتی ئەم هاتینە ئازادكرن ئەم هاتینە گوندێ خوە وی دەمی شەرێ ئیراق و ئیرانێ بوو و گەلەك پێشمەرگە و بەرگیری مللی ل گوندێ مە هەبوو و ب شەڤ زێرەڤانی ل ئێك دو دگرتن و دەڤەرا مە یا ئازادكری بوو و دەستێ پێشمەرگەی دا بوو ئەڤە ل سالێن هەشتێیان بوویە و ئەڤە بەردەوام بوو هەتا شەرێ ئیراق و ئیرانێ هاتیە راوستاندن و ئێك ژ مە هاتە خوارێ و برایێ من چوو توركیا و ل كەمپێ نێشتە جێبوو و پشتی ئەز هاتینە خوارێ ژی دو جاران هاتمە زیندانكرن و جارەكێ پێنچ رۆژان و جارەكێ پازدە رۆژان هاتمە زیندانكرن و بەری ئەنفالان من ژیانا هەژڤینیێ پێك ئینا و نێزیكی شەش هزار دیناران دەین كەفتنە سەر مە و برایێ من نساخ بوو و گەلەك یا بزحمەت بوو هەتا دەرمان گەهشتنە مە و دەین هەمی ل سەر بووین و مە هێستەرەك هەبوو و دەمێ ئەنفالان بەرەف توركیا چووین باب و دایك و چەند عەیال ژی ل گەل من بوون و وەرە دێ چەوا ئەڤان هەمیان دەرباز كەی و ئەم هێدی هێدی چووین وەكی هەمی خەلكی و شەڤەكێ ماینە ب رێكێ دا و خەلكی گۆتن لەشكەرێ دهێت و هەما من هێستر ب تشت ڤە هێلا و زارۆكێن خوە من هلگرتن و زارۆیەكێ من ژیێ وی هەر بتنێ چەند هەیڤەك بوون و جلكێن وا من كرنە تەلیسەكی دا و من دانە پشتا خوە و ئەم چووین و دووف دا هاتمە تشتێ خوە من برنە وی جهی وێ شەڤێ نە نفستین هەتا سپێدێ و رۆژا پاشتر ئەم چووینە ئاڤێ ب دولكێن پێنچ لتری و هەتا هاتین گوتن لەشكر هات و زارۆكێن مە چووونە دەشتا دیلكا وێ شەڤێ چووینە گەلەیەكی دا ماینە وێرێ و پەز ل گەل مەبوون و خەلكی وەكی زارۆكێن خوە پەز تینا و ئەم بووینە دو جین و ئەم وێ شەڤێ چووینە ئاشیتێ و پەزێ مە گوندیان ل گەل خوە بر و ئەو چەند شەڤ بوو ئەم نەنفستین و ئەو تشت هەمی ب پشتا مە ڤە و ئەمێن چین و ئەم پیچەك نڤستین و ژ نشكەكێ ڤە من دیت ژنەكێ ئەم راكرین و گۆت هلونە ڤە داوە ئەڤ خەلكە كەسەك نەمایە و هەر هەمیێ دەربازبووین و ئەم ئەڤ خەلكە دێ سپێدێ مە رادەستی حوكمەتێ كەن و رابن خوە قورتال بكەن وپێشتر كەسەك نەمابوو ل دەڤەرێ و هەر هەمیان خوە قورتال كربوون و زارۆكێن خوە ڤەگوهاست بوون و بابێ من نەهات بوو مابوو ل گوندی و سپێدێ ئەم نێزیكی 1000 مرۆڤان بووین و ئەم هەمی كومكرینە سەر ئێك حوكمەتا توركا و گۆتن دێ خوە لێكدەن و دێ هەوە فرێكرینە ئیراقێ و خەلكی دەنگێ خوە بلندكر و دانا موختاری و جندیێن توركیا ب بەران و سەرێ موختاری و چەند جندیان شكاند و گۆتێ بلا مە ل ڤێرە ب كوژن و ئەم خوە رادەستی حوكمەت و لەشكرێ ئیراقێ ناكەین و ئەفسەرەكێ كورد دناڤ توركان دا هەبوو و گۆت خوە رادەست نەكەن و ئەم هەوە ناكوژین و بتنێ ئەگەر هەوە خوە رادەست كر حوكمەتا ئیراقێ دێ هەوە كوژیت و ئەم چار رۆژا ماینە و خەلكێ دەڤەرێ گەلەك هاریكاریا مە كر و والیێن ئەوا دەڤەرا هاتن و گوتن ئەگەر حوكمەتێ ئەڤ شەڤە لێبورین دەركر هوون دێ ل گەل مە بینن و دووف دا حوكمەتا توركیا لێبورین دەركر و ئەم حەواندین و ئەم ل سەر كەمپان هاتینە بەلاڤەكرن و ئەم بۆ كەمپا مێردینێ هاتینە ڤەگوهاستن و چار سالان ماین و 1991 زڤرینە كوردستانێ.
