گه‌نجه‌كێ زاخۆ دو خه‌لاتێن جیهانی وه‌رگرتینه
هه‌رهین محه‌مه‌د:
گه‌نجه‌كێ باژێرێ زاخۆ ئه‌ڤه بۆ ده‌مێ سێ سالایه ل گه‌ل كۆمپانیا پوپجى وه‌كو دیزاین كار دكه‌ت و ئه‌ڤه دو ساله ژى ل دووڤ ئێك خه‌لاتێ باشترین دیزاینهر و جوانترین دیزاین ب پله‌یا ئێكى ل سه‌رانسه‌رى جیهانێ ب ده‌ست خوه ڤه دئینت.
ئیبراهیم عومه‌ر، گه‌نجه‌كێ باژێرێ زاخۆیه د دیداره‌كێ دا بۆ به‌رپه‌رێ ته‌كنۆلۆژیا یێ رۆژنامه‌یا ئه‌ڤرۆ گۆت: ئه‌ڤه بۆ ده‌مێ سێ سالایه ل گه‌ل كومپانیا پوپجى كار دكه‌ت وه‌كو دیزاینهر و گۆت: “ئه‌ز دیزاینا بۆ یاریان چێدكه‌م وه‌كو بۆ یارێن شه‌رى و سپورتى و وه‌رزشى و گه‌له‌كێن دى و هه‌تا نوكه 338 دیزاینێت یاریا پوپجیێ ئاماده كرینه و دڤێ حه‌فتیێ دا دو خه‌لات ژ لایێ كومپانیا پوپجى من وه‌گرتینه و ئێك ژ وان خه‌لاتێ سالا 2023 وه‌كو باشترین و جوانترین دیزاینهر ل سه‌رانسه‌رى جیهانێ و من پله‌یا ئێكێ ب ده‌ست خوه ڤه ئینايه و خه‌لاتێ دويێ یێ سالا 2024 وه‌كو جوانترین دیزاینا من هاته هه‌لبژارتن و باشترین دیزاینهر و ئه‌ڤه بۆ ده‌مێ دو سالایه ئه‌ز پله‌یا ئێكێ ب ده‌ست خوه ڤه دئینم”.
زێده‌تر گۆت: “هه‌تا نوكه چو كومپانيێت دى داخاز ژ من نه‌كریه كو ل گه‌ل وان كار كه‌م و هه‌كه داخازێ بكه‌ن ژى دێ ره‌تكه‌م، چونكو من ئه‌و ده‌م نینه ل گه‌ل چ كومپانێت دى كاركه‌م و من هه‌موو ده‌مێ خوه دایه دیزاینێت پوپجیێ”.
ده‌رباره‌يى وێ چه‌ندێ كا چه‌ند ده‌م پێ دڤێت هه‌تا ديزاينه‌كێ ب دووماهى دئينيت، ئيبراهيم عومه‌ر گۆت: “هه‌ر دیزاینه‌كێ ده‌مه‌ك بۆ دڤێت و هنده‌ك دیزاین هه‌نه ب دو ده‌مژمێران ب دووماهی دئینم و هنده‌ك ژى ب حه‌فتیه‌كێ ب دووماهی دهێن و گه‌له‌ك جاران هه‌تا سپێدێ ل سه‌ر دیزاینێ كار دكه‌م هه‌تا كو ب دووماهی دئینم حه‌ز دكه‌م هه ركاره‌كێ بكه‌م ده‌رحه‌ق ده‌ركه‌ڤم و ئه‌وى جهى ژ خوه رازى بكه‌م”.
ل دۆر هزرا ديزاينا ياريێن پۆبجى ژى ئاشكه‌را كر كو هزرا دیزاینا یاریێن پوپجێ هه‌موو یێن وى نه گۆت: “ده‌مێ دیزاینا راده‌ستى كومپانیێ دكه‌م دزانم چه‌ند كه‌سان ئه‌و دیزاینا من چێكرى بكار ئینایه وه‌كو یارى و هه‌تا نوكه 18 ملیون كه‌س ل سه‌رانسه‌رى جیهانێ ئه‌و یاریێن من چێكرن دكه‌ن و بكارهێنه‌رێ ئه‌ڤان یاریان یێ به‌رده‌وامه و رۆژ بۆ رۆژێ یێ زێده‌تر لێ دهێت و ئه‌ز گه‌له‌ك یێ ل سه‌ر دیزاینێت ئه‌ڤێ یاریێ كار دكه‌م و ل هزرێن نوى دگه‌رم و بزاڤێ دكه‌م ئه‌ڤ ساله ژى پله‌یا ئێكێ ب ده‌ست خوه ڤه بینم وه‌كو باشترین دیزاینهر و جوانترین دیزاین”.
ده‌رباره‌يى شێوازێ كاركرنێ ژى ئاشكه‌را كر كو ئه‌و چو گرێبه‌ست ل گه‌ل كۆمپانيێ نينن و گۆت: “هه‌ر هه‌یڤ پێنچ ئێڤێنت بۆ من دهێن، به‌لێ كومپانى دبێژیت ئه‌ز دێ تشته‌كى دده‌مه ته كو تو ب كێرى خوه بهیێ، ئانكو وه‌كو پێشبركیێ یه و سوپاس بۆ خودێ هه‌تا راده‌كێ باش بۆ من داهات ژ دیزاینا یاریێن پوپجى دهێت”.
