وه‌كو ئه‌كته‌ر من پشكداری د دو فلمێن سینه‌مایی دا كریه
ئەڤرۆ، زنارتۆڤی:
هونه‌رمه‌ند سه‌میر یوسف عیسا، ل سالا 1963 ێ، ل گوندێ گرگێ ل ده‌ڤه‌را سلۆپیا ل باكورێ كوردستانێ ژ دایك بوویه، د بنیات دا ئاسوری كلدانیه، د دیداره‌كێ دا بۆ رۆژناما ئه‌ڤرۆ دبێژیت: دناڤا گوندێ مه دا پرانیا خه‌لكێ گوندی موسلمان بوون و 20% ێ، ئه‌م مه‌سیحی كلدانی بووین، د زارۆكاتیا خۆ دا د مالدا مه ب كلدانی د ئاخفت و ژ ده‌رڤه‌یی مالێ ئه‌م ب كوردی د ئاخفتین، چونكی زمانێ كوردی و كلدانی ژی زمانێ دایكێ بوو، چ جوداهی بۆ مه نه‌بوو، هه‌ردو زمان بۆ مه وه‌كهه‌ڤبوون، ل سالا 1969 ێ، بۆ خواندنێ ئه‌ز چوومه باژێرێ سته‌نبولێ و من ل وێرێ زمانێن توركی و فره‌نسی خواندن.
ناڤهاتی گۆت ژی: ل سالا 1976 ێ، ل ئیسته‌نبولێ ئه‌ز چووم من كورسه‌كێ مۆزیكێ خواند، ل وێرێ من ده‌ست ب كارێ مۆزیكێ كر و من خوە فێری ژه‌نینا سازێ كر، بۆ ده‌مێ سێ سالان من ل سه‌ر موزیكێ خواند، ل وی ده‌می من گوهداریا رادیۆیا ئێریڤانێ و رادیۆیا به‌غدا دكر و من گوهێ خۆ ددا سترانێن كوردی، من گوهداریا سترانێن كاراپێتێ خاچۆیی و محه‌مه‌د عارفێ جزیری و حه‌سه‌ن جزراوی و سه‌عید ئاغایی دكرن، موزیكا كوردی گه‌له‌ك كاریگه‌ری ل سه‌ر من هه‌بوو، سترانگۆتن ژی ئێك ژ خه‌یالێن من یێن هه‌ره مه‌زن بوو، ده‌م هاتوچوو من ژی سترانگۆتن، هه‌ر چه‌نده ل وی سه‌رده‌می گۆتنا سترانێن كوردی و كلدانی ل توركیا قه‌ده‌غه‌بوون، ل سالا 1982 ێ، ئه‌ز چوومه پاریس ل وه‌لاتێ فره‌نسا، ده‌مێ ئه‌ز چوویم من سازا خوە ژی ل گه‌ل خۆ بر، ئه‌ز نه‌دشیام سازا خۆ بهێلم، ل وێرێ من ده‌ست ب كارێ هونه‌ری كر و ل سالا 1984 ێ، من پشكداری د ئاهه‌نگه‌كێ داكر ل وه‌لاتێ فره‌نسا، ل وی ده‌می رۆژنامه‌ڤانێن فره‌نسی ل مه كۆمبوون و پرسیار ژ من كر، ئه‌ڤه چ ئامیره تو دژه‌نی و ئه‌ڤه چ زمانه تو پێ سترانان دبێژی، من ژی گۆتێ ئه‌ڤه زمانێ كوردی ئه‌ز سترانان پێ دبێژم و رۆژناما ( پۆپلی دۆمان) یا فره‌نسی بوو، دیداره‌ك ل گه‌ل من و من به‌حسێ كوردان و هونه‌رێ كوردی و كلدانی بۆ وان كر و پشتی هنگێ من ژیانا هه‌ڤژینیێ پێكئینا و من چار كور و كچه‌ك هه‌نه.
سه‌میر هێشتا دبێژیت: ل سالا 1987 ێ، ل وه‌لاتێ ئه‌لمانیا من بۆ خۆ گرۆپه‌كێ هونه‌ری چێكر و ئه‌ز چوومه ئاهه‌نگ و هه‌لكه‌فتێن كوردان ل وه‌لاتێن ئورۆپی، ل هه‌مان سال من كاسێته‌كا سترانان ب ناڤێ ( لێ لێ یادێ) به‌لاڤكر، پاشی ل سالا 1989 ێ، من كاسێته‌كا دیتر ب ناڤێ ( سینه‌م) به‌لاڤكر، د هه‌ر كاسێته‌كێ دا من سترانه‌ك یا ژی دو ستران ب زمامێ كلدانی ژی دگۆتن، پشتی هنگێ من كاسێته‌كا دیتر ب ناڤێ ( نازلیێ) من به‌لاڤكر، ئه‌و كاسێته من ل وه‌لاتێ سوید چێكر، ل دووڤ دا من سێ كاسێت ب زمانێ كلدانی چێكرن و به‌لاڤكرن.
وی هونه‌رمه‌ندی گۆت ژی: من كلیپا خۆ یا ئێكێ ب ناڤێ ( ئاخ وه‌لاتێ من) به‌لاڤكریه، ب زمانێ كلدانی من چێكر، هه‌روه‌سا خه‌لكێ مه گه‌له‌ك نه‌خۆشی و كۆچبه‌ری دیتیه، له‌وما من ئه‌و كلیپ ل سه‌ر دووریا وه‌لاتێ خۆ چێكر، پشتی هنگێ من سترانا ( نازلیێ) كلیپكر و من ل پاریسێ وێنه‌كریه، لدووڤدا من سترانا ( میرێ من) كلیپكر، پاشی من سترانا (ئه‌سمه‌رێ) كلیپكر و ئه‌و سترانه من ل زۆزانێن هه‌ردو وه‌لاتێن فره‌نسا و ئیتالیا وێنه‌كریه، خه‌لكی مه یێ كلدانی ژی حه‌ز ژ وان سترانان كریه، ئه‌و ستران و كلیپێن من ل گه‌له‌ك ته‌له‌ڤزیۆنان هاتینه په‌خشكرن، هه‌روه‌سا من په‌یوه‌ندیێن باش ل گه‌ل هونه‌رمه‌ند شڤان په‌روه‌ری و حه‌سه‌ن شه‌ریفی و هوزان شه‌مدینی هه‌نه، هه‌روه‌سا من هه‌ڤالینی ل گه‌ل هه‌ردو هونه‌رمه‌ندێن نه‌مر سه‌عید گاباری و سه‌عید یوسفی هه‌بوو، دیسا من په‌یوه‌ندی و تێكه‌لی ل گه‌ل هونه‌رمه‌ندان جۆلیانا جۆندو و جه‌نان ساوا و چه‌ندین هونه‌رمه‌ندێن دیتر هه‌نه، هه‌رده‌م من ڤیایه خزمه‌تا هونه‌رێ كوردی بكه‌م.
سه‌میری ئه‌و ژی گۆت: من حه‌ز ل سه‌ر كارێ سینه‌مایێ ژی هه‌یه، ل سالا 1982 ێ، ل پاریسێ من كارێ ئه‌كته‌ریێ د فلمێ سینه‌مایی یێ ( دیوار) دا كریه، كو ئه‌و فلمه ژ ده‌رهێنانا ده‌رهێنه‌رێ مه‌زنێ كورد( یلماز گۆنایی) بوویه، ل وی ده‌می یلمازی داخواز ژ من كر، ئه‌ز پشكداریێ د وی فلمێ سینه‌مایی دا بكه‌م و كو ئه‌ز د ژیێ 19 سالیێ دابووم، چه‌ندین هونه‌رمه‌ند و ئه‌كته‌رێن كورد پشكداری د وی فلمی دا كریه، پاشی من پشكداری د فلمێ ده‌رهێنه‌رێ كورد هونه‌ر سه‌لیمی دا كر یێ بناڤێ ( بژی ئازادیا كوردستانێ)، د وی فلمی دا من موزیك دژه‌نی، هه‌روه‌سا میدیاێن فره‌نسی گه‌له‌ك دیدار و ریپۆرتاژ ل سه‌ر هونه‌رێ من به‌لاڤكرینه، ل سالا 2017 ێ، ئه‌ز هاتیمه هه‌رێما كوردستانێ و من پشكداری د به‌رنامه‌كێ هونه‌ری دا كر ل وار تیڤی و ل رادیۆیا دهۆكێ، نوكه ژی ئه‌ز ل سه‌ر كارێ خۆ یێ هونه‌ری یێ به‌رده‌وامم و كار ل سه‌ر چێكرنا هنده‌ك به‌رهه‌مێن نوو یێن هونه‌ری دكه‌م.
