بۆچی فارس ته‌مه‌ر فانۆسێ د كه‌ڤالێن خوه دا بكاردئینت؟
هه‌رهین محه‌مه‌د:
هونه‌رمه‌ندێ شێوه‌كار فارس ته‌مه‌ر ددیداره‌كێ دا بۆ به‌رپه‌رێ هونه‌ری یێ رۆژنامه‌یا ئه‌ڤرۆ گۆت: ل سالا 2019 مه ده‌ست ب ڤه‌كرنا پێشانگه‌هێن هه‌ڤپشككریه و ب تایبه‌ت ل گه‌ل هونه‌رمه‌ندێن عه‌ره‌ب وه‌كو فێستیڤالا بوون و ژ هه‌موو باژێركێن ئیراقێ پشكدارببون و به‌روڤاژی ئه‌م ژی پشكداردبین د پێشانگه‌هێن ئه‌وان دا و كه‌ڤالێن خوه بۆ وان دهنێرین و ئه‌و بخوه دوو مفایان ژێ دبینن و ل گه‌ل پێشانگه‌هێ گه‌شتێ ژی دكه‌ن و مه ب ئه‌ڤێ چه‌ندێ په‌یوه‌ندیه‌كا باش ل گه‌ل وان چێكریه و رێك بۆ وان هاتینه خوه‌شكرن و مه وه‌سا دانین زاخۆ مالا مه‌زن یا هه‌موو هونه‌رمه‌ندانه ل هه‌ر جهه‌كێ لێبن و ده‌مێ خه‌لكێ بیانی ژێ بهێن ئه‌م وه‌كو خه‌لكێ زاخۆ پێشوازیه‌كا جوان لێدكه‌ین و ئه‌و ژی حه‌زدكه‌ن چالاكێن خوه لێ ئه‌نجام بده‌ن و ب ئه‌ڤێ هاتنوچوونا مه دناڤبه‌را وان دا په‌یوه‌ندیێن مه یێن هونه‌ری خورتر لێهاتینه و گوهورینا هزرو بیرانه و هه‌ردیسان ئه‌و روتینه ژی دهێته شكاندن یا نوكه ئه‌م ژیانێ تێدا ده‌رباز دكه‌ین.
هه‌روه‌سا گۆت: به‌ری چه‌ند هه‌یڤان ب كه‌ڤاله‌كی پشكداری پێشانگه‌هه‌كا هه‌ڤپشك بووم ل گه‌له‌ریا زاخۆ و پتریا كه‌ڤالێن من ئه‌ز تێدا فانوسێ بكاردئینم و من مه‌ره‌ب پێ هه‌یه و دكه‌ڤالی دا فانوس دژوره‌كا تاری ڤه و یا پشت گوه هاڤێتیه و شویشه‌یێن وێ شكه‌ستینه و فانوس ژی تێكچوویه و ژه‌نگی بوویه و به‌رب نه‌مانێ دچیت و ئه‌و كه‌سێن دوان ژوراڤه كاردكه‌ن پێدڤی رۆناهیێ نه و ئه‌و بخوە ژی فانوسێ دروست ناكه‌ن و ئه‌و پێدڤی رۆناهیا ژده‌رڤه‌نه و په‌نجه‌ره‌ك ل هنده‌ڤی ئه‌وێ ژورێ و فانوسێ هه‌یه و ئه‌و رۆناهیا ژده‌رڤه دهێت ل ژور دده‌ت و هه‌كه دبیته شه‌ڤ ژی چ تشت نامینن و دونیا تاری دبیت، چونكو ته‌كه‌ز پتر ل سه‌ر رۆناهییا ژده‌رڤه‌یه و ئه‌و ژی فانوسا خوه دروست ناكه‌ن كو رۆناهی ژێ ده‌ركه‌ڤیت و ده‌مێ دبیته ئه‌ڤ ل وان رۆن بیت، له‌ورا دبێژم ل ئه‌ڤێ دووماهیێ ته‌كه‌زا مه كه‌فتیه ل سه‌ر هه‌ر بابه‌ته‌كی ژده‌رڤه‌كی كوردستانێ و ئیراقێ وهه‌كه به‌حسێ كوردستانێ بكه‌م پتر ئه‌م گرنگیێ بكارێن ژده‌رڤه دده‌ین و هه‌موو تشتێ ژده‌رڤه‌یه چ كرێكار بهێن ژده‌رڤه كاركه‌ن، یان كه‌لوپه‌ل ژده‌رڤه بهێن هه‌تا كو كه‌لوپه‌لێن مه یێن هونه‌ری ژی ژده‌رڤه دهێن.
